დონალდ ტრამპმა მარინ ლე პენს მხარდაჭერა გამოუცხადა

ამერიკის შეერთებული შტატების პრეზიდენტმა დონალდ ტრამპმა „კუდიანებზე ნადირობა“ უწოდა საფრანგეთის პარლამენტის წევრის, ულტრამემარჯვენე მარინ ლე პენის გასამართლებას.

31 მარტს პარიზის სასამართლომ მარინ ლე პენი დამნაშავედ ცნო ევროკავშირის თანხების გაფლანგვაში და თავისუფლება 4 წლით აღუკვეთა.

პრეზიდენტმა ტრამპმა 4 აპრილს, თავის სოციალურ ქსელ Truth Social-ში დაწერა, რომ „კუდიანებზე ნადირობა მარინ ლე პენის წინააღმდეგ კიდევ ერთი მაგალითია, როგორ იყენებენ ევროპელი მემარცხენეები კანონს, რათა ჩაახშონ სიტყვის თავისუფლება და პოლიტიკური ოპონენტი ცენზურას დაუქვემდებარონ“.

აშშ-ის პრეზიდენტი მიიჩნევს, რომ ფრანგი ულტრამემარჯვენეების ლიდერს ბრალად დასდეს „უმნიშვნელო დანაშაული“, რომელიც სავარაუდოდ, არც იცოდა. დონალდ ტრამპის შეფასებით, საქმე ეხებოდა „ბუღალტრულ შეცდომას“.

„თავისუფლება მარინ ლე პენს“, - წერს ტრამპი სოციალურ ქსელში.

პარიზის სასამართლოს მიერ 31 მარტს გამოტანილი განაჩენით, საფრანგეთის ულტრამემარჯვენე პარტიის, „ეროვნული გაერთიანების“ ლიდერი მარინ ლე პენი დამნაშავეა ევროპარლამენტარობის პერიოდში თანაშემწეთა ფიქტიურად დაქირავებასა და მათთვის განკუთვნილი ხელფასის პარტიული მიზნებით გამოყენებაში.

გამოძიების თანახმად, დაახლოებით 12 წლის განმავლობაში მითვისებული იყო თითქმის სამი მილიონი ევრო. პროკურატურა ლე პენისთვის ხუთწლიან პატიმრობას ითხოვდა. მარინ ლე პენი ბრალდებას უარყოფს.

სასამართლომ ულტრამემარჯვენე პოლიტიკოსს თავისუფლება ოთხი წლით შეუზღუდა. მათგან ორი წელი პირობითია, ორი წლის განმავლობაში კი მარინ პე პენმა ელექტრონული სამაჯური უნდა ატაროს. პარიზის სასამართლომ ლე პენს ხუთი წლით აუკრძალა არჩევითი პოლიტიკური თანამდებობის დაკავება, რაც ნიშნავს, რომ 2027 წლის საპრეზიდენტო არჩევნებში კანდიდატად მისი მონაწილეობა კითხვის ნიშნის ქვეშ დადგა.

მარინ ლე პენმა, რომელსაც განაჩენის გასაჩივრება შეუძლია, პარიზის სასამართლოს გადაწყვეტილებას პოლიტიკური უწოდა.