ელისაშვილის საქმეზე „ვივამედი“ სამართალდამრღვევად ცნეს პერსონალურ მონაცემთა გასაჯაროვების გამო

2 days ago 7

პერსონალურ მონაცემთა დაცვის სამსახურმა პოლიტიკოს ალეკო ელისაშვილის საქმეზე სამართალდამრღვევად ცნო კლინიკა „ვივამედი“ და მის გენერალურ დირექტორს, ნინო ნადირაძეს, ელისაშვილის პირადი ინფორმაციის შემცველი ფეისბუკპოსტის წაშლა დაავალა.

ინფორმაციას ალეკო ელისაშვილი ავრცელებს და პერსონალურ მონაცემთა დაცვის სამსახურის გადაწყვეტილების "სქრინს" აქვეყნებს.

უწყებამ „ვივამედი“ სამართალდამრღვევად ცნო პერსონალურ მონაცემთა დაცვის კანონის იმ მუხლის დარღვევაში, რომელიც „განსაკუთრებული კატეგორიის მონაცემთა“ უკანონო დამუშავებას კრძალავს.

მუხლი გაფრთხილებას ან 3000 ლარამდე ჯარიმას ითვალისწინებს. კლინიკა მხოლოდ გააფრთხილეს.

ამასთან, ნინო ნადირაძეს დაავალეს, წაშალოს 10 იანვრით დათარიღებული პოსტი, რომელშიც ელისაშვილის ჯანმრთელობის მდგომარეობაზე წერს და მისი რენტგენის ფოტოს აქვეყნებს.

ალეკო ელისაშვილი, რომელიც პარტია „ძლიერი საქართველოს“ ერთ-ერთი ლიდერია, 4 დეკემბერს დააკავა პოლიციამ „ქართული ოცნების“ წევრ ალი ბაბაევის „ძალადობის გამოყენებით დევნის“ ბრალდებით. ინციდენტი 2024 წლის 2 დეკემბერს თბილისში, კოსტავას ქუჩაზე, მოხდა.

ელისაშვილს, - რომელიც დაკავების შემდეგ „ვივამედში“ გადაიყვანეს, - კლინიკამ გამოკვლევები ჩაუტარა.

„გამოკვლევები ჩამიტარეს, რენტგენიც გადამიღეს და მხოლოდ დაჟეჟილობა გაქვსო“, - წერდა ალეკო ელისაშვილი მოგვიანებით.

თუმცა, როგორც მან ერთი თვის შემდეგ, 10 იანვარს, განაცხადა, მოგვიანებით „ვივამედისგან“ დამოუკიდებლად ჩატარებულმა ტომოგრაფიამ აჩვენა, რომ არათუ დაჟეჟილობა, არამედ ნეკნის მოტეხილობა ჰქონდა.

„როგორც ჩანს, ვივამედი ისე აცხობს და წერს აქციებზე ნაცემი და დაკავებული ხალხის დიაგნოზებს, როგორც ზემოდან დაურეკავენ და დაავალებენ“, - განაცხადა ელისაშვილმა.

სწორედ ამ განცხადებაზე პასუხად გამოაქვეყნა კლინიკის გენერალურმა დირექტორმა ნინო ნადირაძემ ელისაშვილის რენტგენი და დაწერა:

„არავის გაუბედავს, თქვენიანების გარდა ვივამედზე ზეწოლა და დიაგნოზების კარნახი, არანაირი მწვავე ტრავმა არ აღინიშნებოდა. ვიმეორებ, მწვავე. ტკივილგამაყუჩებელიც კი არ გააკეთებინა მორიგე ექიმს. არაპროფესიონალიც დაინახავს“.