ეს სანქციები ჩვენთვის საერთოდ არაფერ ნიშნავს – მდინარაძე

„ქართული ოცნების“ აღმასრულებელი მდივანი მამუკა მდინარაძე აცხადებს, რომ ბალტიის ქვეყნების მიერ დაწესებული სანქციები მმართველი პარტიისთვის არაფერს ნიშნავს.

მდინარაძის თქმით, უფრო მკაცრი და მძიმე დარტყმები შეიძლება მიიღონ, რადგან ევროკავშირში „დიფ სტეიტის“ ძლიერი გავლენებია ჩარჩენილი.

„ქართული ოცნების“ შეთქმულების თეორიის ბოლო ვერსიით, „დიფ სტეიტი“ არის იგივე „გლობალური ომის პარტია“. “გლობალური ომის პარტია” არის “ქართული ოცნების” შეთქმულების თეორია, რომლის საფუძველზეც ეს პარტია ქვეყანას მართავს და საგარეო ურთიერთობებს განსაზღვრავს.

„ეს სანქციები ჩვენთვის საერთოდ არაფერს ნიშნავს. იქიდან გამომდინარე, რომ ევრობიუროკრატებიდან, სადაც „დიფ სტეიტის“ გავლენებია ჩარჩენილი მძლავრად, იქნება ზეწოლა. უფრო მეტიც შეიძლება იყოს, უფრო მკაცრი და მძიმე დარტყმები შეიძლება მივიღოთ, მაგრამ ეს არაფერს აღარ ნიშნავს, რადგან მთელმა მსოფლიომ დაინახა სიმართლე. ევროპელებმაც, ამერიკელებმაც, ქართველებმა, მათ შორის, ყველამ ერთად დავინახეთ, სად არის სიმართლე.

ყველაზე ურწმუნო ადამიანმაც კი, თუ ოდნავ ობიექტურად ფიქრობს, უნდა შეხედოს, საით არის სიმართლე და ეს სანქციები რას ემსახურება. ვიდრე სიმართლე ხელის გულზე გამოვიდოდა, ასეთიი სანქციები მაშინ არ იყო საშიში, რადგან საქართველო და მისი ხელისუფლება თავის სიმაღლეზე იდგა, დამოუკიდებლობის ხარისხს აუმჯობესებდა ამ ყველაფრის მიუხედავად, და დღეს, მით უმეტეს, ამის პრობლემა არ არის “,- განაცხადა მამუკა მდინარაძემ.

ლიეტუვამ, ლატვიამ და ესტონეთმა საქართველოს ათობით მოქალაქე დაასანქცირეს. მათ შორის არიან მოსამართლეები, პროკურორები, პოლიციის მაღალჩინოსნები, დეპუტატები და ა.შ.

ყველაზე მეტი – 74 საქართველოს მოქალაქე ლიეტუვამ დაასანქცირა, შემდეგ მოდის ესტონეთი – 55 დასანქცირებულით, ბოლოს ლატვია – 16 დასანქცირებული.

რაც შეეხება ესტონეთს, მის მიერ დასანქიცრებულთა შორის არიან ნეტგაზეთი/ბათუმელების თანადამფუძნებლისა და დირექტორის, მზია ამაღლობელის საქმის პროკურორი, დაზარალებულად ცნობილი ბათუმის პოლიციის უფროის ირაკლი დგებუაძე და მოწმე პლიციელები. ასევე, პროევროპული აქციების განმავლობაში დაკავებული მოქალაქეების პროკურორები და მოსამართლეები. ესტონეთის მიერ სანქცირებულთა შორის არიან “ქართული ოცნებისა” და პრორუსული ძალადობირივ ჯგუფის, ალტ-ინფოს წევრებიც.

ლიეტუვის საგარეო საქმეთა სამინისტროს განცხადებით, დღეს დაასანქცირეს თანამდებობის პირები, რომლებიც პასუხისმგებელნი არიან ადამიანის უფლებებისა და ძირითადი თავისუფლებების უხეშ და სისტემატურ დარღვევებზე, ასევე ქართველი ხალხის რეპრესიებზე

ლიეტუვის საგარეო საქმეთა სამინისტროს განცხადებით, სანქციები შეეხოთ იმ პოლიცილებსაც, რომლებიც „ბათუმელებისა“ და „ნეტგაზეთის“ დამფუძნებლისა და დირექტორის, მზია ამაღლობელის წინააღმდეგ საქმეში ფიგურირებენ.

• ვინ დაასანქცირეს ბალტიის ქვეყნებმა – სია
• ესტონეთმა დაასანქცირა მზია ამაღლობელის საქმის მოსამართლეები, პროკურორები და ირაკლი დგებუაძე
• მოსამართლეები, პროკურორები, პოლიცილები – ვინ დაასანქცირა ლიეტუვამ