ეფესბე უკრაინას ბრალს სდებს მიტროპოლიტ ტიხონის აფეთქების მცდელობაში

რუსეთის უშიშროების ფედერალურმა სამსახურმა უკრაინის დაზვერვას ბრალი დასდო თავდასხმის მომზადებაში რუსეთის მართლმადიდებელი ეკლესიის სიმფეროპოლისა და ყირიმის მიტროპოლიტ ტიხონზე (შევკუნოვი).

განცხადებაში, რომელსაც რუსეთის სახელმწიფო მედიასაშუალებები და ტელეგრამის არხები ავრცელებენ, ნათქვამია, რომ მოსკოვში დააკავეს უკრაინელი და რუსი პირები, რომლებიც უკრაინის დაზვერვას ჰყავდა გადაბირებული.

ეფესბეს ვერსიით, 2024 წლის დეკემბერში დაკავებულებს საიდუმლო სამალავის მეშვეობით გადაეცათ ასაფეთქებელი მოწყობილობა, თითქოს იმ მიზნით, რომ ის განეთავსებინათ მოსკოვის სრეტენსკის მონასტერში, ტიხონის დედაქალაქში ყოფნისას აეფეთქებინათ და შემდეგ ყალბი პასპორტებით რუსეთი დაეტოვებინათ.

რუსეთის ძალოვანი უწყებების ცნობით, დაკავებულებმა აღიარებითი ჩვენებები მისცეს. მათ წაუყენეს ტერორისტული აქტის მომზადებისა და ასაფეთქებელი მოწყობილობის უკანონო ფლობის ბრალდებები.

გამოცემა "ნოვაია გაზეტა" 27 თებერვალს წერდა, რომ მოსკოვში იანვარსა და თებერვალში დააკავეს სრეტენსკის სემინარიის ორი კურსდამთავრებული. "მათ ადანაშაულებენ ნიჩბის ქონაში, რომლთაც მათ თითქოს წვენის ყუთში განთავსებული ტროტილი ჩანამარხეს ტერლეცკის პარკში" - ნათქვამი იყო სტატიაში.

დაკავებულების სახელებია დენის პოპოვიჩი და ნიკიტა ივანკოვიჩი.

"ნოვაია გაზეტა" წერს, რომ 2022 წელს ტიხონის მიერ დაარსებული სრეტენსკის სემინარიის კურსდამთავრებულებზე დასმენები გამოაქვეყნა ტელეგრამზე მოქმედმა არხმა "ეპისკოპ ლიუციფერი" - რომელშიც კურსდამთავრებულებს ბრალს სდებდნენ "ბანდეროვცული ლობის" შექმნაში ეპისკოპოსის გარემოცვის რიგებში.

უკრაინის მხარე ეფესბეს ბრალდებებზე ჯერჯერობით განცხადებას არ ავრცელებს.

რუსეთის სპეცსამსახურები რეგულარულად იუწყებიან, რომ დააკავეს პირები, რომლებიც თითქოს ტერაქტებს ამზადებდნენ, მათ შორის უკრაინის დავალებით. რადიო თავისუფლების რუსული სამსახურის ცნობით, მიმდინარე წელს ძალოვანი უწყებების წარმომადგენლებმა რამდენიმე ადამიანი მოკლეს დაკავებისას.

ტიხონ (შევკუნოვი) რუსეთის მართლმადიდებელი ეკლესიის ერთ-ერთი ყველაზე ცნობილი წარმომადგენელია, იგი ამავდროულად ითავსებს ტელეწამყვანის და მწერლის როლებს. მედიაში მას "პუტინის მოძღვარს" უწოდებენ ხოლმე, ოღონდ ეს არც რუსეთის პრეზიდენტს, ვლადიმირ პუტინს და არც თავად შევკუნოვს არ დაუდასტურებიათ. თუმცა მიტროპოლიტი ხშირად ჩნდება ღონისძიებებზე, რომლებშიც პუტინიც მონაწილეობს, და ისტორიასთან და პოლიტიკასთან მიმართებით რუსეთის პრეზიდენტის პოზიციები დიდწილად ემთხვევა ხოლმე შევკუნოვის შეხედულებებს. ანექსირებული ყირიმის მიტროპოლიტი ტიხონი 2023 წელს გახდა, მანამდე იგი ფსკოვის მიტროპოლიტი იყო.