ექსმინისტრ ბურჭულაძის საქმეზე დაკავებულმა მხეიძემ და ხაინდრავამ ციხე დატოვეს

თავდაცვის ყოფილმა მინისტრმა, პატიმრობაში მყოფმა ჯუანშერ ბურჭულაძემ და მისმა ცოლისძმამ, ვასილ მხეიძემ, ყოფილი პრემიერ-მინისტრის, პატიმრობაში მყოფი ირაკლი ღარიბაშვილის წინააღმდეგ წარმოებულ ახალ სისხლის სამართლის საქმეზე ჩვენება მისცეს.

გამოძიების თანახმად, ბურჭულაძის ჩვენებით, თავდაცვის ყოფილმა მინისტრმა ბიზნესმენისგან [საუბარია ზურაბ ტუკვაძეზე] მიღებული 1,5 მილიონი ლარიდან 750 000 ლარი რამდენიმე ეტაპად „ქეშად“ გადასცა ირაკლი ღარიბაშვილს.

ჩადენილი დანაშაული

• ბურჭულაძე თბილისის სააპელაციო სასამართლომაც დამნაშავედ ცნო თავდაცვის სამინისტროში მუშაობის დროს სამსახურებრივი უფლებამოსილების ბოროტად გამოყენებასა და უკანონო შემოსავლის ლეგალიზაციაში.
• ვასილ მხეიძე - დიდი ოდენობით თანხის გაფლანგვაში დახმარებასა და ზეგავლენით ვაჭრობაში;
• გიორგი ხაინდრავა სააპელაციო სასამართლომ დამნაშავედ ცნო დიდი ოდენობით თანხის გაფლანგვაში.

საპროცესო შეთანხმების პირობები

ჯუანშერ ბურჭულაძეს სასჯელის სახით განესაზღვრა 5 წლით თავისუფლების აღკვეთა, საიდანაც 3 წელს მოიხდის საპატიმროში, 2 წელი კი ჩაეთვლება პირობითად, იმავე გამოსაცდელი ვადით. მას ასევე დაეკისრა ჯარიმა 1 000 000 ლარის ოდენობით და სახელმწიფოს სასარგებლოდ უსასყიდლოდ ჩამოერთვა სხვადასხვა სახის ქონება.

ვასილ მხეიძეს 4 წლითა და 2 თვით პატიმრობა მიესაჯა, საიდანაც 1 წელს და 2 თვეს მოიხდის სასჯელაღსრულების დაწესებულებაში, ხოლო 3 წელი ჩაეთვლება პირობით, იმავე გამოსაცდელი ვადით. მას ასევე დაეკისრა ჯარიმა 100 000 ლარის ოდენობით, სახელმწიფოს სასარგებლოდ უსასყიდლოდ ჩამოერთმევა ნივთმტკიცებად ამოღებული საგნები - რამდენიმე მილიონის ღირებულების უაქციზო სიგარეტი და მის დასამზადებლად არსებული მასალა, ასევე თუთუნი.

გიორგი ხაინდრავას მიესაჯა 4 წლითა და 2 თვით თავისუფლების აღკვეთა, საიდანაც 1 წელს და 2 თვეს მოიხდის სასჯელაღსრულების დაწესებულებაში, ხოლო 3 წელი ჩაეთვლება პირობით, იმავე გამოსაცდელი ვადით. მასვე დაეკისრა ჯარიმა 100 000 ლარის ოდენობით.