ვატო შაქარაშვილი „მთავარი არხის“ ჟურნალისტს ფიზიკურად გაუსწორდა

მამნიაშვილი ამბობს, რომ ვატო შაქარაშვილს „მონა“ დაუძახა, რადგან 17 მარტს სწორედ მისი ორგანიზაციის მიმართვის გამო დააყადაღეს იმ ფონდების ანგარიშები, რომლებიც პროევროული აქციების მონაწილეებსა და სხვა სოციალურად დაუცველ ადამიანებს ეხმარებოდნენ.

„შემთხვევით დავინახე ვატო შაქარაშვილი და გოგა ხაინდრავა - ვიდეო ჩავრთე და ვუთხარი, რომ მონა იყო თავისი საქმიანობის გამო იმის გამო, ფონდების დაყადაღება ვიგულისხმე. ამის გამო გადავიდა ფიზიკურ ანგარიშსწორებაზე, რამდენჯერმე წიხლი დამარტყა და სახეში სილა გამაწნა ხუთ-ექვსჯერ. პოლიციამ როგორც კი დაინახა, მოვიდა. ეგენი რომ არ ყოფილიყვნენ, არ ვიცი, რა მოხდებოდა“, - ამბობს მამნიაშვილი.

ვატო შაქარაშვილი თავისუფალია. მან რადიო თავისუფლებას დაუდასტურა, რომ გიორგი მამნიაშილს ფიზიკური შეურაცხყოფა მიაყენა:

„რაც ცხოვრებაში ხდება, ადამიანს როცა შეურაცხყოფას აყენებენ, ეგ ხდება ხოლმე. არაფერი განსაკუთრებული - ცხვირ-პირში ხვდება იმას, ვინც მონას დამიძახებს. რომ არ მოხვედრია, იმიტომაც ბედავენ ამდენს. სხვაც გააკეთებს? - სხვასაც მოხვდება... სილა [მოვარტყი], „პადლეცი“... თუ არ დაანებებენ ქუჩაში ადამიანების დევნას და შეურაცხყოფას თავს, მიიღებენ უარესს“.

ვატო შაქარაშვილმა არ უპასუხა რადიო თავისუფლების კითხვას - ელის თუ არა სასჯელს ფიზიკური შეურაცხყოფისთვის. სისხლის სამართლის კოდექსის 126-ე მუხლით ძალადობა ისჯება პატიმრობით.

მოძრაობა „ერთიანი ნეიტრალური საქართველო“, რომელიც ხშირად იმეორებს მმართველი პარტიის, „ქართული ოცნების“ გზავნილებს, 2024 წლის 10 ივლისს დაფუძნდა. ამ ორგანიზაციის განცხადებებს ხშირად ავრცელებენ ხელისუფლებასთან აფილირებული მედიასაშუალებები.