ზღუდავს ქართულ დემოკრატიას - ნორვეგიის საგარეო უწყება „ქართული ოცნების“ მიღებულ კანონებზე

„ნორვეგია შეშფოთებულია საქართველოს ხელისუფლების ახალი რეპრესიული ინსტრუმენტებით, მათ შორის „უცხოეთის აგენტების“ კანონპროექტით და ინიციატივებით, რაც ოპოზიციური პარტიების აკრძალვის საშუალებას იძლევა“, - წერს საგარეო უწყება 3 აპრილს გავრცელებულ განცხადებაში.

„ეს [ყველაფერი] ლახავს გამოხატვის თავისუფლებას, ახდენს სამოქალაქო სივრცისა და პოლიტიკური მრავალფეროვნების დემონტაჟს და ზღუდავს ქართულ დემოკრატიას“, - აცხადებს სამინისტრო.

3 აპრილს საქართველოზე კომენტარი გააკეთა ნიდერლანდების საგარეო საქმეთა მინისტმა კასპარ ველდკამპმა.

„ჩვენ ძალიან შეშფოთებულნი ვართ საქართველოში მოვლენების განვითარებით, მათ შორის იმიტომ, რომ ვხედავთ, საქართველოს მოსახლეობის ასე დიდი ნაწილი არის ევროკავშირში გაწევრების მომხრე, სურს ევროპული ჰორიზონტისკენ სვლა და გვსურს, რომ მხარი დავუჭიროთ მათ, რათა გააგრძელონ თავიანთი პოზიციის დაცვა“, - განუცხადა მან ჟურნალისტებს ბრიუსელში.

იქვე ესტონეთის საგარეო საქმეთა მინისტრმა მარგუს ცაჰკნამ განაცხადა, რომ ევროკავშირის დღის წესრიგში დგას საქართველოსათვის ევროკავშირთან უვიზო მიმოსვლის შეჩერების საკითხი, რასაც, მისი თქმით, მხოლოდ 15 წევრი ქვეყნის თანხმობა სჭირდება.

„მოვუწოდებთ ევროკავშირს, დაიწყოს სავიზო რეჟიმის ლიბერალიზაციის გაუქმების პროცესი“, — განაცხადა მან.

წინა დღეს, 2 აპრილს კი ევროკავშირისუმაღლესმა წარმომადგენელმა საგარეო ურთიერთობებისა და უსაფრთხოების პოლიტიკის საკითხებში, ვიცე-პრეზიდენტმა კაია კალასმა და ევროკომისარმა გაფართოების საკითხებში, მარტა კოსმა განაცხადეს:

„აუცილებელია, შეწყდეს ძალადობა მოქალაქეების წინააღმდეგ, გათავისუფლდეს უსაფუძვლოდ დაკავებული ყველა პირი, შეჩერდეს რეპრესიული კანონები, გაიმართოს კონსულტაციები ვენეციის კომისიასთან და დაიწყოს არსებითი დიალოგი სამოქალაქო საზოგადოებასა და ყველა პოლიტიკურ აქტორთან, რათა მოიძებნოს გამოსავალი არსებული კრიზისიდან“.

„უცხოეთის აგენტების რეგისტრაციის აქტი“ „ქართული ოცნების“ პარლამენტმა 1 აპრილს მიიღო მესამე და საბოლოო მოსმენით და ამავე პარტიის არჩეულმა პრეზიდენტმა მიხეილ ყაველაშვილმა იმავე დღეს მოაწერა ხელი.

იგი ძალაში შედის მე-60 დღეს, რაც 2025 წლის 30 მაისი გამოდის.

„ქართულის ოცნების“ პარლამენტმა 1 აპრილს მიიღო მედიისა და სამოქალაქო ორგანიზაციების შემზღუდავი და სხვა რამდენიმე კანონი.