თეთრ სახლში სანქციებით ახსნეს ის ფაქტი, რომ ტრამპის ტარიფები რუსეთს არ შეეხო

მსოფლიოს იმ ქვეყნებს შორის, რომლებსაც ამერიკის შეერთებული შტატების პრეზიდენტმა დონალდ ტრამპმა სულ მცირე 10%-იანი საბაჟო გადასახადი დაუწესა, რუსეთი არ არის.

თეთრი სახლის პრესმდივანმა კეროლაინ ლივიტმა გამოცემა Axios-ს განუცხადა, რომ რუსეთის წინააღმდეგ მოქმედი სანქციები უკვე ბარიერია რუსეთთან ყოველგვარი მნიშვნელოვანი ვაჭრობისთვის.

ამასთან, როგორც გამოცემა წერს, აშშ გაცილებით მეტს ვაჭრობს რუსეთთან, ვიდრე, მაგალითად, მავრიკიასა და ბრუნეისთან, რომლებსაც პრეზიდენტმა ტრამპმა საბაჟო ტარიფები დაუწესა.

აშშ-ის ოფიციალური სტატისტიკით, 2024 წელს რუსეთთან სავაჭრო ბრუნვა 3,5 მილიარდი დოლარი იყო. რუსეთიდან იმპორტმა 3 მილიარდი დოლარი შეადგინა, რაც 2023 წლის მაჩვენებელზე 34,2%-ით ნაკლებია.

თეთრი სახლის პრესმდივანმა გამოცემა Axios-ს უთხრა, რომ უკვე არსებული სანქციებია იმის მიზეზიც, რომ საბაჟო ტარიფები არ დაუწესდათ ბელარუსს, კუბას და ჩრდილოეთ კორეას.