ივლისის გეომაგნიტური ქარიშხლების პროგნოზი – თვის დასაწყისში G2 კლასის შტორმია მოსალოდნელი

2026 წლის ივლისის დასაწყისში გეომაგნიტური ველის არასტაბილურობის რამდენიმე ეპიზოდია მოსალოდნელი. სპეციალისტების შეფასებით, თვე მთლიანობაში შედარებით მშვიდი იქნება, თუმცა პირველ დღეებში მაგნიტოსფეროს აქტივობა გაიზრდება, რამაც მეტეომგრძნობიარე ადამიანების ნაწილს შესაძლოა დისკომფორტი შეუქმნას.

წინასწარი პროგნოზის მიხედვით, ივლისის პირველ დღეებში დედამიწის მაგნიტოსფერო პერიოდულად აღგზნებულ მდგომარეობაში გადავა. განსაკუთრებით აქტიური პერიოდი 3 ივლისს არის მოსალოდნელი, როდესაც G2 კლასის, ანუ ზომიერი გეომაგნიტური ქარიშხალი ფიქსირდება. 1, 2 და 4 ივლისს კი მოსალოდნელია მაგნიტოსფეროს აღგზნება (Kp ინდექსით 5-მდე). თვის დანარჩენი პერიოდი, არსებული მონაცემებით, შედარებით სტაბილურ გეომაგნიტურ ფონს აჩვენებს, თუმცა პროგნოზი შესაძლოა განახლდეს მზის აქტივობის ცვლილების შემთხვევაში.

🟡 1 ივლისი – აღგზნებული მაგნიტოსფერო (Kp 4–5)
🟡 2 ივლისი – აღგზნებული მაგნიტოსფერო (Kp 4–5)
🟠 3 ივლისი – G2 (ზომიერი) გეომაგნიტური ქარიშხალი
🟡 4 ივლისი – აღგზნებული მაგნიტოსფერო (Kp 4–5)
🟢 5–31 ივლისი – სტაბილური გეომაგნიტური ფონი

რას ნიშნავს G2?

G2 კლასის (ზომიერი) გეომაგნიტური ქარიშხლის დროს შესაძლებელია პოლარული ციალის გავრცელება უფრო სამხრეთ განედებზე. ცალკეულ შემთხვევაში კი მოსალოდნელია მცირე შეფერხებები თანამგზავრულ კავშირზე, GPS სისტემებსა და ელექტროენერგიის ქსელებზე.

მეტეომგრძნობიარე ადამიანების ნაწილი ასეთ დღეებში აღნიშნავს თავის ტკივილს, დაღლილობას ან ძილის რეჟიმის დარღვევას, თუმცა ამ ეფექტების პირდაპირი სამეცნიერო კავშირი გეომაგნიტურ ქარიშხალთან ბოლომდე დადასტურებული ჯერ კიდევ არ არის.

როგორ შეიძლება იმოქმედოს ჯანმრთელობაზე?

მიუხედავად იმისა, რომ გეომაგნიტური ქარიშხლების გავლენა ადამიანის ჯანმრთელობაზე ერთმნიშვნელოვნად დადასტურებული არ არის, პრაქტიკაში ადამიანები ხშირად უჩივანს:

• თავის ტკივილს;
• არტერიული წნევის მერყეობას;
• დაღლილობას;
• უძილობას;
• გაღიზიანებას;
• ყურადღების კონცენტრაციის შემცირებას.

ექიმები რეკომენდაციას იძლევიან, ასეთ დღეებში განსაკუთრებული ყურადღება მიექცეს დასვენებას, საკმარისი რაოდენობით წყლის მიღებას, ალკოჰოლისა და ზედმეტი ფიზიკური დატვირთვის თავიდან აცილებას, ხოლო ქრონიკული დაავადებების მქონე პაციენტებმა მკურნალი ექიმის რეკომენდაციები უნდა დაიცვან.

პროგნოზი შესაძლოა შეიცვალოს

აღსანიშნავია, რომ გეომაგნიტური ქარიშხლების პროგნოზი მუდმივად ახლდება, რადგან მზეზე მიმდინარე პროცესების ზუსტად წინასწარ განსაზღვრა შეუძლებელია. ამიტომ ზემოთ მოცემული თარიღები მხოლოდ წინასწარ შეფასებას წარმოადგენს.

კოსმოსური ამინდის სპეციალისტების თქმით, ყველაზე ზუსტი მონაცემები, როგორც წესი, 24-72 საათით ადრე ფიქსირდება და მზის აქტივობის ცვლილების შემთხვევაში პროგნოზიც შესაბამისად კორექტირდება.

თუ მზეზე ძლიერი აფეთქებები დაფიქსირდა, მოსალოდნელია, რომ პროგნოზშიც შესაბამისი ცვლილებები აისახება.

რა არის გეომაგნიტური ქარიშხალი?

გეომაგნიტური ქარიშხალი წარმოიქმნება მაშინ, როდესაც მზიდან გამოტყორცნილი დამუხტული ნაწილაკები დედამიწის მაგნიტურ ველს აღწევენ. ძლიერი აქტივობის შემთხვევაში შესაძლოა დაფიქისრდეს დროებით შეფერხებები თანამგზავრულ კავშირებში, GPS-ის მუშაობაში, რადიოკომუნიკაციასა და ელექტროენერგიის ინფრასტრუქტურაში.

მეცნიერები აღნიშნავენ, რომ ასეთი მოვლენები ბუნებრივი პროცესია და უმეტეს შემთხვევაში მოსახლეობისთვის სერიოზულ საფრთხეს არ წარმოადგენს.

რას ნიშნავს Kp და G-კლასები?

🟢 Kp 0–3 – მშვიდი გეომაგნიტური ფონი;
🟡 Kp 4–5 – აღგზნებული მაგნიტოსფერო;
🟠 G1 – სუსტი გეომაგნიტური ქარიშხალი;
🔴 G2 – ზომიერი გეომაგნიტური ქარიშხალი;
⚠️ G3–G5 – ძლიერი და ძალიან ძლიერი ქარიშხლები.

თამთა გურული