ირაკლი კობახიძის თქმით, წლების განმავლობაში „ძალდატანებული კოჰაბიტაციის რეჟიმში“ ცხოვრობდნენ

„ქართული ოცნების“ მთავრობის მეთაური ირაკლი კობახიძე ტელეკომპანია „იმედის“ გადაცემაში „იმედის კვირა“ ამბობს, რომ პარტიას წლების განმავლობაში „ძალდატანებულ კოჰაბიტაციის რეჟიმში“ უწევდა ცხოვრება და დღეს „საქართველო არის დამოუკიდებელი და სუვერენული, როგორც არასდროს“.

მისივე თქმით, 2012 წლამდე ქვეყანას სრულად ჰქონდა დაკარგული სუვერენიტეტი და „9 წლის განმავლობაში ქვეყანას მართავდა უცხოური აგენტურა“.

„დღეს არის ფუნდამენტურად განსხვავებული ვითარება, როდესაც ქვეყანამ დაიბრუნა რეალური სუვერენიტეტი და დამოუკიდებლობა“, - ამბობს პრემიერი, რომელიც პოსტზე დაამტკიცა სადავო ერთპარტიულმა პარლამენტმა, რომლის ლეგიტიმურობას არ ცნობს საქართველოს მეხუთე პრეზიდენტი სალომე ზურაბიშვილი, ოპოზიციური პარტიები, რომლებმაც უარი განაცხადეს პარლამენტში შესვლაზე, საზოგადოების მნიშვნელოვანი ნაწილი, არასამთავრობო ორგანიზაციები და კითხვები აქვთ საერთაშორისო პარტნიორებს.

კოჰაბიტაცია საქართველოში 2012 წლის ოქტომბერში დაიწყო, როდესაც საპარლამენტო არჩევნებში ოპოზიციურმა კოალიციამ „ქართული ოცნება — ბიძინა ივანიშვილის“ მეთაურობით გაიმარჯვა, ხოლო მაშინდელი პრეზიდენტი მიხეილ სააკაშვილი (ერთიანი ნაციონალური მოძრაობის ლიდერი) თანამდებობაზე 2013 წლის ოქტომბრამდე დარჩა. შესაბამისად, ერთი წლის განმავლობაში ქვეყანაში გვქონდა ხელისუფლების ორი პოლუსი: პრეზიდენტი ერთი პარტიიდან და მთავრობა — სხვა პარტიიდან.

"ქართული ოცნების" ლიდერებმა კოჰაბიტაციაზე სხვადასხვა დროს სხვადასხვა ინტერპრეტაციით ილაპარაკეს — ზოგჯერ ამ პროცესს აუცილებლობად წარმოაჩენდნენ, ზოგჯერ კი კრიტიკულად საუბრობდნენ, რომ ეს იყო "ძალიან დიდი დათმობა" ყოფილი მმართველი ძალისთვის.

ივანიშვილი ხშირად ამბობდა, რომ კოჰაბიტაცია იყო დასავლური პარტნიორების რეკომენდაციით საჭირო ნაბიჯი, რათა საქართველოს არ დამართნოდა პოლიტიკური ქაოსი და არ დაზარალებულიყო ქვეყნის იმიჯი დასავლეთში.

კობახიძე პირდაპირ ამბობს, რომ კოჰაბიტაცია იყო შეცდომა. მისი განმარტებით, ქართულ ოცნებას რომ არ ემოქმედა დასავლური პარტნიორების რეკომენდაციებით, ნაციონალური მოძრაობის გავლენა ბევრად ადრე შემცირდებოდა.