ირაკლი შაიშმელაშვილის თქმით, პოლიციელების მაიდენტიფიცირებელი ნიშნები გდდ-ში „ხარებას“ მისვლის შემდეგ აიკრძალა

შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს ყოფილი უფროსი ირაკლი შაიშმელაშვილი ქვეყნის დატოვებამდე ინტერვიუში ამბობს, რომ „აქციაზე მყოფი ჯინსებში ჩაცმული ადამიანები გდდ-ს თანამშრომლები არ არიან“. გდდ-ს ყოფილ მაღალჩინოსანთან ექსკლუზიური ინტერვიუ ტვ პირველის საინფორმაციო სამსახურის უფროსმა ნოდარ მელაძემ ჩაწერა.

26 დეკემბრის საღამოს ცნობილი გახდა, რომ შაიშმელაშვილმა ქვეყანა უსაფრთხოების მიზნით დატოვა. ინტერვიუ მანამდეა ჩაწერილი.

ის ეთანხმება ჟურნალისტის ეჭვს, რომ შავებში ჩაცმული, ნიღბიანი და განსაკუთრებით აგრესიული პირები სპეციალური ჯგუფები არიან, რომლებსაც აქციაზე არა მართლწესრიგის დამყარება, არამედ არეულობა სურთ.

ირაკლი შაიშმელაშვილის განმატებით, განსაკუთრებულ დავალებათა დეპარტამენტში აქციების დროს ორი კატეგორიის დანაყოფებია წარმოდგენილი: რობოკოპები და დაკავების ჯგუფები.

„რობოკოპები მოქმედებენ კოლოფის შემადგენლობაში, რომელიც რუსთაველს წმინდავს წყლის ჭავლისმანქანის გამოყენებით . მეორე არიან დაკავების ჯგუფები, თუმცა კადრებში მეც ვნახე, ასევე არიან ჯინსებში ჩაცმული ადამიანები, რომლებიც გდდ-ს თანამშრომლები ნამდვილად არ არიან", - ამბობს შაიშმელაშვილი.

ჟურნალისტის დამაზუსტებელ კითხვაზე, მისი ნაამბობი უნდა გავიგოთ თუ არა ისე, რომ დანაშაულს დემონსტრანტების წინააღმდეგ არა გდდ-ს თანამშრომლები, არამედ სხვა პირების სჩადიოდნენ, გდდ-ს ყოფილი მაღალჩინოსანი პასუხობს:

„მე არ ვიცი ეს ადამიანები ვინ არიან, ესეთი დეპარტამენტი არ ყოფილა, ამ დეპარტამენტს მსგავსი რამე არ გაუკეთებიათ, რაც სწავლებები ჩატარებულა, ვინ არიან, საიდან მოვიდნენ, არ ვიცი, სახეზეც არ ვიცი. ეს არ ემსახურება წესრიგის აღდგენას. ჩემთვის გაუგებარია, რატომ რა მიზნით, თუ არა მიზანმიმართულად, განხორციელებულიყო ამ აქციის მონაწილეებზე ანგარიშსწორება“, - ამბობს შაიშმელაშვილი.

ის ამბობს, რომ შსს არაფერს გამოიძიებს, რადგან სისტემის შიგნით არსებობს წესი, რომ არავინ დაისჯება. ეს მიდგომა კი მისი ხედვით ემსახურება იმ უკანონო დავალებების შესრულებას, რომელსაც შავებში ჩაცმული პოლიციელები აქციის დარბევისას სჩადიან. მათ ხელშეუხებლობის გარანტია აქვთ. ამას გარდა პრობლემაა იდენტიფიცირება. შავებში ჩაცმულ პოლიციელებს ნომრები არ აქვთ. მაიდენტიფიცირებელი ნიშნები შაიშმელაშვილის თქმით, 2021 წლიდან გაქრა, მას შემდეგ რაც გდდ-ს ხელმძღვანელი ზვიად ხარაზიშვილი იგივე ხარება გახდა.

„ხელისუფლება იტყუება, არანაირი გამოძიება არ ტარდება, არანაირი გამოძიება არ ტარდება, არავინ იკითხება, არც დაიკითხება, პირველი ვერ დააიდენტიფიცირებენ, სისტემაშიც შეიძლება არ იცოდნენ ვინ არიან, სისტემაში არ ხდება იდენტიფიცირება, არ არის მათი სანომრე ნიშნები.

ახალი წესები დააწესეს გდდ-ს ცალკეული დანაყოფების გარდა ყველა დეპარტამენტმა მოირგო ნიღაბი, რაც არ შეიძლება, საპატრულო, კრიმინალური, რატომ? რისთვის სჭირდება ნიღაბი პოლიციელს, რომელიც იცავს სახელმწიფოს?", - სვამს კითხვას შაიშმელაშვილი და პასუხობს:

„რომ ვერ მოხდეს ინდეტიფიცირება და თუ იქნება ცალკეული ბრძანებები მოქმედების არეალი გაეზარდოს... შიდა სამზარეულოში ასე აქვთ, რომ არავინ დაისჯება... ამით პოლიციელებს ეუბნებიან შენ თუ ამას გამიკეთებ, მე ამით დაგიცავ".

გდდ-ს ოპერატიული დაგეგმვის სამმართველოს ყოფილი უფროსი დარწმუნებულია, რომ მოქმედი ხელისუფლების პირობებში პოლიციელების მიერ კანონის დარღვევას, დემონსრანტებსა და ჟურნალისტებზე ძალადობას არავინ გამოიძიებს. მისივე თქმით, სპეციალურ საგამოძიებო სამსახურსა და შსს-ს შორის ფორმალური კომუნიკაციაა, ისინი წერილს აგზავნიან, შსს-ს კი პასუხობს, რომ საიდუმლო ინფორმაციაა.

ირაკლი შაიშმელაშვილმა 26 დეკემბერს ფეისბუკზე გამოაქვეყნა თბილისის საერთაშორისო აეროპორტში ოჯახთან ერთად გადაღებულ ფოტო და მადლობა გადაუხადა პრეზიდენტ სალომე ზურაბიშვილსა და აშშ-ის საელჩოს საქართველოში.

ირაკლი შაიშმელაშვილმა სამსახური დეკემბრის დასაწყისში დატოვა, პატაკში კი მიზეზად „ოჯახური პირობები“ დაასახელა.

პატაკი, რომელიც 3 დეკემბრით თარიღდება, მან ფეისბუკზე გამოაქვეყნა და პოსტად საქართველოსა და ევროკავშირის დროშები დაურთო.

30 დღეა, დემონსტრანტები დედაქალაქსა და რეგიონებში აპროტესტებენ „ქართულ ოცნებაში“ მიღებულ გადაწყვეტილებას, რომლის მიხედვითაც, საქართველო 2028 წლის ბოლომდე დღის წესრიგში არ დააყენებს ევროკავშირში გასაწევრიანებლად მოლაპარაკების გახსნის საკითხს.

28 ნოემბრის შემდეგ პოლიციამ აქციის დარბევისას და დაშლისას 400-ზე მეტი დემონსტრანტი დააკავა, მათ შორის სისხლის სამართლის წესით დააკავა 30-ზე მეტი ადამიანი, რომელთაც რამდენიმეწლიანი პატიმრობა ემუქრებათ. მათ რიცხვში არიან საზოგადოებისთვის ცნობილი სახეებიც.