nostal.ge ახალი ამბები 
ირლანდიიდან საქართველოს 43 მოქალაქე გამოაძევეს. დუბლინის აეროპორტიდან თბილისის საერთაშორისო აეროპორტში ჩარტერული რეისი 20 სექტემბერს შესრულდა. მათ შორის იყო ოჯახი სამი ბავშვით.
ოპერაცია ირლანდიის პოლიციის სპეციალურმა საიმიგრაციო განყოფილებამ – Garda National Immigration Bureau-მ ჩაატარა. ოფიციალური ინფორმაციით, დეპორტირებულთა შორის 33 მამაკაცი, 7 ქალი და 3 არასრულწლოვანი იყო.
რა გახდა ქართველების გაძევების საფუძველი
ირლანდიის პოლიციის განმარტებით, 42 ადამიანს დეპორტაციის ბრძანების საფუძველზე დაატოვებინეს ქვეყანა. ეს ბრძანებები იუსტიციის მინისტრმა 1999 წლის Immigration Act-ის შესაბამისად გასცა.
კიდევ ერთი მამაკაცი ქვეყნიდან ახალი, 2026 წელს მიღებული International Protection Act-ის საფუძველზე გაცემული Return Decision-ის შესაბამისად დაბრუნდა ე. წ. წარმოშობის ქვეყანაში (საქართველოში).
ირლანდიის პოლიციის ინფორმაციით, ჯგუფში ოთხი ზრდასრული მამაკაცი ირლანდიაში ჩადენილი დანაშაულისთვის მსჯავრდადებულია. მათი ქვეყნიდან გაძევება, პოლიციის განმარტებით, ქვეყნის მასშტაბით მიმდინარე სამართალდამცავ ოპერაციებსაც უკავშირდება.
ამასთან, ირლანდიის ხელისუფლება ხაზს უსვამს, რომ საქართველოს მოქალაქეების აბსოლუტური უმრავლესობა ქვეყანაში კანონიერად ცხოვრობს და ირლანდიურ საზოგადოებაში დადებითი წვლილი შეაქვს. ამის შესახებ იუსტიციის, შინაგან საქმეთა და მიგრაციის მინისტრმა ჯიმ ო’კალაჰანმა განაცხადა.
რა დაჯდა რეისი დუბლინიდან თბილისში
43 ადამიანი საქართველოში ირლანდიის ხელისუფლებამ ჩარტერული რეისით დააბრუნა.
თვითმფრინავი დუბლინის აეროპორტიდან 20 სექტემბერს, ადგილობრივი დროით 13:50 საათზე გაფრინდა და თბილისში 18:40 საათზე დაეშვა.
ირლანდიის იუსტიციის დეპარტამენტის ინფორმაციით, თვითმფრინავის დაქირავება ჩარტერის შესასრულებლად დუბლინიდან თბილისამდე და უკან, დუბლინში 225 575 ევრო დაჯდა, დღგ-ის გარეშე.
დეპორტირებულებს ბორტზე თან ახლდნენ ირლანდიის პოლიციის თანამშრომლები, სამედიცინო პერსონალი და თარჯიმანი, აგრეთვე, ადამიანის უფლებების დამოუკიდებელი დამკვირვებელი.
ეს 2026 წელს უკვე მეექვსე ჩარტერული დეპორტაციაა
20 სექტემბრის ოპერაცია ირლანდიისთვის 2026 წელს მეექვსე ჩარტერული დეპორტაციის რეისი იყო.
The Irish Times-ის ინფორმაციით, წლის დასაწყისიდან ამ ტიპის რეისებით ქვეყნიდან უკვე 221 ადამიანი გაიყვანეს. შედარებისთვის, 2025 წელს ირლანდიამ ექვსი ჩარტერული ოპერაციით 182 ადამიანი დააბრუნა წარმოშობის ქვეყანაში, ხოლო კიდევ ევროკავშირის 23 მოქალაქეს ქვეყანა სხვა ტიპის გაძევების ბრძანებებით დაატოვებინეს.
ირლანდიური გამოცემა ასევე წერს, რომ 2026 წელს დეპორტაციების რაოდენობა წინა წლებთან შედარებით მნიშვნელოვნად გაიზარდა. The Irish Times-ის მონაცემებით, 2025 წელს ირლანდიიდან 434 დეპორტაცია განხორციელდა, 2024 წელს – 162, ხოლო 2023 წელს – 79.
ამავე გამოცემის ინფორმაციით, 20 სექტემბრის რეისის ჩათვლით, 2026 წელს ირლანდიიდან დეპორტირებული ადამიანების საერთო რაოდენობამ 392-ს მიაღწია.
რამდენი ქართველი ცხოვრობს ირლანდიაში?
ირლანდიაში ქართული თემის მიმდინარე ზუსტი რაოდენობის დადგენა შეუძლებელია.
ირლანდიის სტატისტიკის ცენტრალური სამსახურის (CSO) ბოლო სრული აღწერის მიხედვით, რომელიც 2022 წელს ჩატარდა, ქვეყანაში იმ პერიოდში 631 785 არაირლანდიელი მოქალაქე ცხოვრობდა, რაც მოსახლეობის დაახლოებით 12%-ს შეადგენდა. ყველაზე მრავალრიცხოვან უცხოელთა ჯგუფებს შორის იყვნენ პოლონეთის, დიდი ბრიტანეთის, ინდოეთის, რუმინეთისა და ლიეტუვის მოქალაქეები. საქართველოს მოქალაქეები ცალკე ყველაზე მსხვილ ჯგუფად გამოყოფილ სიაში არ მოხვდნენ.
თუმცა არსებობს საკმაოდ საინტერესო სტატისტიკა ქართველ თავშესაფრის მაძიებლებზე.
2022 წელს საქართველოდან ირლანდიაში საერთაშორისო დაცვის მოთხოვნებმა მკვეთრად მოიმატა. The Irish Times მაშინ წერდა, რომ მხოლოდ 2022 წლის პირველ ექვს თვეში ირლანდიაში თავშესაფარი 1 100-ზე მეტმა ქართველმა მოითხოვა.
ირლანდიის ხელისუფლების სტატისტიკის მიხედვით, 2023 წელს საქართველოდან საერთაშორისო დაცვის 1 065 განაცხადი შევიდა. ამ მაჩვენებლით საქართველო იმ წელს განაცხადების რაოდენობით ქვეყნების ათეულში იყო.
შემდეგ წლებში ეს მაჩვენებელი მნიშვნელოვნად შემცირდა. The Journal-ის მიხედვით, საქართველოს მოქალაქეების მიერ შეტანილი საერთაშორისო დაცვის განაცხადების რაოდენობა 2022 წლის 2 459-დან – 2024 წელს 638-მდე შემცირდა.
თავშესაფრის მაძიებელთა რაოდენობა, რა თქმა უნდა, არ ნიშნავს, რომ ირლანდიაში მთლიანობაში სწორედ ამდენი ქართველი ცხოვრობს. ეს მხოლოდ იმ ადამიანების სტატისტიკაა, რომლებმაც კონკრეტულ პერიოდში საერთაშორისო დაცვა მოითხოვეს.
გამოცემის ინფორმაციით, საქართველო ირლანდიის ხელისუფლების მიერ „უსაფრთხო წარმოშობის ქვეყნად“ არის მიჩნეული, რის გამოც ასეთი განაცხადები დაჩქარებული პროცედურით განიხილება.
ირლანდიის ხელისუფლება აცხადებს, რომ ასევე პრიორიტეტულად მიიჩნევს ნებაყოფლობითი დაბრუნების პროგრამას იმ ადამიანებისთვის, რომელთაც ქვეყანაში დარჩენის სამართლებრივი საფუძველი აღარ აქვთ, ან ვისი საერთაშორისო დაცვის განაცხადიც უარყოფილია. ნებაყოფლობით დაბრუნება შესაძლებელია მანამდე, სანამ კონკრეტულ პირზე დეპორტაციის ბრძანება გაიცემა.
ამრიგად, 20 სექტემბრის დეპორტაცია ჩარტერული რეისით ირლანდიის საიმიგრაციო პოლიტიკის გამკაცრების უფრო ფართო პროცესის ნაწილია. ამ კონკრეტული ოპერაციის შედეგად, როგორც აღვნიშნეთ, საქართველოს 43 მოქალაქე დაბრუნდა სამშობლოში, მათ შორის, ერთი ოჯახი სამი არასრულწლოვანი შვილით. ირლანდიის ოფიციალური მონაცემებით, წლის განმავლობაში მსგავსი ოპერაციები კიდევ გაგრძელდება.
