კონგრესში ტრამპის გამოსვლის შემდეგ დემოკრატებმა ამომრჩევლებს გააქტიურებისკენ მოუწოდეს

ამერიკელმა დემოკრატებმა კონგრესში პრეზიდენტ დონალდ ტრამპის გამოსვლა და მისი პოლიტიკა გააკრიტიკეს და ამომრჩევლებს პოლიტიკურ პროცესებში აქტიური მონაწილეობისკენ მოუწოდეს. სენატორმა ელისა სლოტკინმა განაცხადა, რომ დემოკრატია გადასარჩენია.

დემოკრატმა სენატორმა ამერიკელ ამომრჩევლებს მიმართა, რომ დღეს ქვეყანას სჭირდებიან ისე, როგორც არასდროს და მოუწოდა, თანამდებობებზე არჩეულ პირებს პრობლემებზე პასუხი ორგანიზებულად მოსთხოვონ.

ელისა სლოტკინმა გააკრიტიკა პრეზიდენტ დონალდ ტრამპის ეკონომიკური გეგმა და განაცხადა, რომ მაშინ, როცა საშუალო სტატისტიკურ ამერიკელებს სამართლიანი საგადასახადო სისტემა სჭირდებათ, ტრამპი თავისი მილიარდერი მეგობრების დასაჩუქრებას ცდილობს.

დემოკრატმა სენატორმა გააკრიტიკა უკრაინისადმი პრეზიდენტ დონალდ ტრამპის ადმინისტრაციის დამოკიდებულებაც და 28 თებერვალს, თეთრ სახლში პრეზიდენტ ზელენსკისთან ტრამპის და ვიცე-პრეზიდენტ ვენსის დაპირისპირება და განაცხადა, რომ პრეზიდენტი რეიგანი ალბათ, საფლავში გადატრიალდა.

ელისა სლოტიკინის განცხადებით, ის, როგორც „ცივი ომის“ პერიოდის ბავშვი, მადლობელია, რომ 1980-იან წლებში აშშ-ის ხელისუფლებაში იყო რონალდ რეგანი და არა დონალდ ტრამპი, რომელიც „ცივ ომს“ წააგებდა.