radiotavisupleba ახალი ამბები 
18 სექტემბერს, საღამოს, ლუქსემბურგის საერთაშორისო აეროპორტმა რამდენიმე საათით მუშაობა შეაჩერა, "უნებართვო უპილოტო საფრენი აპარატების" აღმოჩენასთან დაკავშირებით აეროპორტის სიახლოვეს და მის თავზე. ამ ინფორმაციას ავრცელებს სააგენტო Reuters-ი.
ლუქსემბურგის ერთადერთი საერთაშორისო აეროპორტის ადმინისტრაცია აცხადებდა, რომ ფრენები შეჩერდა სიფრთხილისთვის, მგზავრების, ავიაკომპანიების ეკიპაჟების, აეროპორტის პერსონალისა და თვითმფრინავების უსაფრთხოების უზრუნველსაყოფად.
აეროპორტიდან არ გავრცელებულა დეტალური ცნობები დრონების წარმოშობაზე და არც იმაზე, თუ ვინ მართავდა მათ.
შაბათს დილით აეროპორტმა მუშაობა განაახლა, თუმცა შესაძლებელია იყოს გარკვეული შეფერხებები და განრიგის დარღვევის შემთხვევები - იუწყება აეროპორტის ადმინისტრაცია.
ლუქსემბურგის აეროპორტი წარმოადგენს მთავარ ცენტრს ქვეყნის სახელმწიფო გადამზიდავი კომპანიისთვის Luxair. აეროპორტის ადმინისტრაცია აცხადებს, რომ სამართალდამცავებთან ერთად გააგრძელებს ვითარებაზე დაკვირვებას. ხელისუფლებას ჯერჯერობით არ გაუვრცელებია ცნობა ეჭვებზე მომხდართან დაკავშირებით.
17 სექტემბერს პოლონეთის პრემიერ-მინისტრი, დონალდ ტუსკი პოლონეთის სპეცსამსახურების მონაცემებზე დაყრდნობით აცხადებდა, რომ რუსეთი რაკეტების და დრონების გამოყენებით გეგმავს ჰიბრიდული დარტყმების განხორციელებას უკრაინის მხარდამჭერ სახელმწიფოებზე. 18 სექტემბერს საფრანგეთის პრეზიდენტმა, ემანუელ მაკრონმა საპარლამენტო პარტიების ლიდერებთან და სპეცსამსახურების წარმომადგენლებთან გამართა სხდომა, სადაც განიხილეს ვითარების გაუარესება რუსეთიდან მომდინარე ჰიბრიდულ საფრთხეებთან დაკავშირებით. ცნობილი გახდა ასევე, რომ ლიეტუვამ მოამზადა ვილნიუსის მცხოვრებთა ევაკუაციის გეგმა, სამხედრო საფრთხის შემთხვევისთვის - ხოლო ესტონეთის ხელისუფლებამ განაცხადა, რომ რუსეთთან საზღვარს სწრაფად დახურავს, თუ კრემლი მობილიზაციას გამოაცხადებს.
ევროპელი პოლიტიკოსები ეყრდნობიან სპეცსამსახურების მონაცემებს, რომ რუსეთმა, შესაძლოა, ევროკავშირის ქვეყნების წინააღმდეგ პირდაპირი სამხედრო მოქმედებების დაწყების გარეშე გააფართოვოს თავისი "ჰიბრიდული" მოქმედებები - რომლებმაც შესაძლოა მოიცვას დრონების მიერ თითქოს შემთხვევით განხორციელებული დარტყმები, ან დივერსიები.
ბოლო ხანებში ამოუცნობი დრონების გამო მუშაობა შეაჩერეს ევროპის რამდენიმე ქვეყნის აეროპორტებმა, მათ შორის ბელგიაში, გერმანიაში, დანიაში, შვედეთსა და ნორვეგიაში. ერთი თვის წინ ლაიფციგის აეროპორტში აღმოაჩინეს დრონი, რომელსაც ასაფეთქებელი მოწყობილობა ჰქონდა მიმაგრებული - ის იმყოფებოდა საბრძოლო მასალებით დატვირთული უკრაინის თვითმფრინავის სიახლოვეს. გერმანიის ხელისუფლებამ მოსკოვს პირდაპირ დასდო ბრალი ამ ინციდენტთან კავშირში.
ტერორიზმთან ბრძოლის საერთაშორისო ცენტრის (ICCT) და პროექტ Globsec-ის დათვლით, უკრაინასთან სრულმასშტაბიანი ომის ოთხ წელზე ცოტა მეტი დროის განმავლობაში კრემლმა ორგანიზება გაუკეთა 151-მდე ჰიბრიდულ თავდასხმას ევროპის ტერიტორიაზე. აშშ ახლახან აცხადებდა დანაშაულებრივი ქსელის გახსნაზე - როგორც იუწყებიან, ქსელს მოსკოვიდან უწევდნენ კოორდინაციას და მას კავშირი ჰქონდა დივერსიებთან ჩეხეთსა და ლიეტუვაში.
