მამუკა ხაზარაძეს ბრალი წარუდგინეს „ოცნების“ კომისიაზე გამოუცხადებლობის გამო

პროკურატურა აცხადებს, რომ „გამოძიებით დადგინდა“, რომ ხაზარაძე პარლამენტში „ქართული ოცნების“ მიერ შექმნილ დროებით საგამოძიებო კომისიაზე არ გამოცხადდა.

„მიუხედავად იმისა, რომ ... გაფრთხილებული იყო გამოუცხადებლობის შემთხვევაში კანონმდებლობით გათვალისწინებული პასუხისმგებლობის შესახებ, იგი დროებითი საგამოძიებო კომისიის სხდომაზე არასაპატიო მიზეზით არ გამოცხადდა“, - აცხადებს პროკურატურა.

ხაზარაძეს ბრალდება წარუდგინეს სისხლის სამართლის კოდექსის 349-ე მუხლით, - „საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობის“ მუხლით.

ბრალდება ითვალისწინებს ჯარიმას ან თავისუფლების აღკვეთას ვადით ერთ წლამდე, - თანამდებობის დაკავების ან საქმიანობის უფლების ჩამორთმევით ვადით სამ წლამდე.

პროკურატურა სასამართლოს მიმართავს და აღკვეთის ღონისძიების შეფარდებას მოითხოვს.

27 მარტს ხაზარაძე სასამართლოში იმყოფებოდა გამოკითხვაზე: „მთავარი კითხვა არის, რატომ არ მივედი ე.წ. პარლამენტის კომისიის სხდომაზე, რომელსაც ვუწოდე ცირკი და ბიძინას შოუ... მთელმა მსოფლიომ იცის, რომ ბიძინა ივანიშვილმა 2024 წლის 26 ოქტომბრის არჩევნები რუსული მეთოდით გააყალბა“, - თქვა მამუკა ხაზარაძემ სასამართლოს დატოვების შემდეგ.

„ქართული ოცნების“ პარლამენტის დროებით საგამოძიებო კომისიაში ყოფილ პოლიტიკოსებსა და სამხედროებს ჰკითხავენ 2008 წლის აგვისტოს ომთან, ასევე 2003-12 წლებში მიმდინარე მოვლენებთან დაკავშირებით.

რამდენიმე პოლიტიკოსი, რომელიც პარლამენტის ლეგიტიმურობას არ ცნობს, კომისიის სხდომაზე არ გამოცხადა და უარს აცხადებს. მათ შორის არიან

• ბადრი ჯაფარიძე, ხაზარაძის თანაგუნდელი;
• ყოფილი თავდაცვის მინისტრი ირაკლი ოქრუაშვილი.

ორივე მათგანის წინააღმდეგ თეა წულუკიანმა პროკურატურას მიმართა.

კომისიაზე მისვლაზე უარს ამბობენ ასევე ყოფილი პოლიტიკოსი, ამჟამად ტელეწამყვანი გიორგი თარგამაძე („ფორმულა“) და გივი თარგამაძე, 2008-12 წლებში პარლამენტის თავდაცვისა და უშიშროების კომიტეტის თავმჯდომარე.

„ქართულ ოცნებას“ გამოცხადებული აქვს, რომ კომისიის მუშაობის დასრულების შემდეგ სურს „კოლექტიური ნაციონალური მოძრაობის“ აკრძალვა, - რაც მისი წინასაარჩევნო დაპირება იყო 2024 წლის არჩევნებში.

სადავო არჩევნებში, - რომლის შედეგების ლეგიტიმაციაც ეჭვის ქვეშაა როგორც საშინაო, ისე საგარეო ასპარეზზე გაყალბების, ამომრჩეველზე ზემოქმედებისა და ხმის მიცემის ფარულობის დარღვევაზე ბრალდებების ფონზე, - „ქართულმა ოცნებამ“ 48,22% მიიღო.

ამასთან, „ქართული ოცნების“ მიერ პარლამენტში ინიციირებული ახალი ცვლილებებით, საკონსტიტუციო სასამართლოს 9-თვიანი ვადა უწესდება პარტიების აკრძალვის საკითხის განსახილველად, ხოლო წინასაარჩევნო პერიოდში, - თუკი „მსგავსი“ პარტია უკვე აკრძალული აქვს, - გადაწყვეტილების მიღება 14 დღეში შეეძლება.