„მაშინ დაბრუნდეს, როცა მშვიდობისთვის იქნება მზად“ — ტრამპი ზელენსკიზე

ტრამპმა შეხვედრის შემდეგ განაცხადა, რომ ზელენსკიმ უპატივცემულობა გამოავლინა თეთრი სახლის ოვალურ კაბინეტში.

„ძალიან მნიშვნელოვანი შეხვედრა გვქონდა დღეს თეთრ სახლში. ბევრ რამეს გაიგებ ასეთ შეხვედრაზე ისეთს, რასაც ვერასდროს მიხვდები საუბრის გარეშე ასეთ წნეხსა და დაძაბულობაში.

შესანიშნავია, რომ ემოციებით ბევრ რამეს ავლენს. მე მივხვდი, რომ პრეზიდენტი ზელენსკი არ არის მზად მშვიდობისთვის, თუ ამერიკა ჩაერთვება საქმეში, რადგან მას ჰგონია, რომ ჩვენი ჩართულობა დიდ უპირატესობას აძლევს მოლაპარაკებებში.

მე არ მინდა უპირატესობა, მე მინდა მშვიდობა.

მან უპატივცემულობა გამოავლინა შეერთებული შტატებისადმი ჩვენთვის ძვირფას ოვალურ კაბინეტში.

შეუძლია მაშინ დაბრუნდეს, როცა მშვიდობისთვის იქნება მზად“, — განაცხადა ტრამპმა ზელენსკისთან შეხვედრის შემდეგ.

ზელენსკიმ თავი გააქნია და უპასუხა, რომ შეერთებული შტატები თანდათან იგრძნობს ამ ომის შედეგებს. ზელენსკის სიტყვებით უკმაყოფილება გამოხატა ტრამპმა.

„თქვენ ვერ გვიკარნახებთ, ჩვენ რას ვიგრძნობთ. არ ხართ იმ პოზიციაში, რომ რამე გვიკარნახოთ. ძალიან კარგად და ძლიერად ვიგრძნობთ თავს“, — შეაწყვეტინა აშშ-ის პრეზიდენტმა ზელენსკის.

მანამდე ტრამპმა შეხვედრისას აღნიშნა, რომ ის არც პუტინის მომხრეა და არც არავისი და რომ ის მხოლოდ ამერიკის შეერთებულ შტატებთან არის მჭიდროდ დაკავშირებული.

„თქვენ გინდათ, რომ მე მკაცრი ვიყო. იმაზე მკაცრიც შემიძლია ვიყო, ვიდრე ეს საერთოდ წარმოგიდგენიათ, მაგრამ ასე შეთანხმებას ვერასდროს მიაღწევთ“, — თქვა ტრამპმა პუტინისა და ზელენსკის ურთიერთმიმართებასთან და უკრაინაში რუსეთის ომთან დაკავშირებით.

არსებობდა მოლოდინი, რომ შეხვედრაზე ტრამპი და ზელენსკი ხელი მოაწერდნენ შეთანხმებას, რომლითაც შეერთებულ შტატებს ექნება წვდომა უკრაინის წიაღისეულზე, უკრაინა კი უსაფრთხოების გარანტიებს მიიღებს.

ტრამპმა შეხვედრაზე აღნიშნა, რომ უკრაინის პრეზიდენტი მესამე მსოფლიო ომს ეთამაშება და სათანადოდ არ ავლენს მადლიერებას.

მანამდე ტრამპმა უპასუხა კითხვას უკრაინის იარაღით დახმარების შესახებ და აღნიშნა, რომ აშშ განაგრძობს დახმარებას, მაგრამ იმედია, ეს დიდხანს აღარ მოუწევთ.

„ჩვენ არ ველით, რომ ბევრ იარაღს გავგზავნით. ჩვენ ველით, რომ ომი მალე დასრულდება. ასე რომ, დიახ, იარაღს გავგზავნით, მაგრამ იმედია, რომ არ მოგვიწევს ბევრის გაგზავნა“, — თქვა ზელენსკისთან შეხვედრისას ტრამპმა.

დღეებით ადრე ტრამპმა ზელენსკი დიქტატორად მოიხსენია. მერე კი, ჟურნალისტის კითხვის პასუხად, აღნიშნა, რომ არ სჯერა, უკრაინის პრეზიდენტს დიქტატორს არ უწოდებდა.

ტრამპთან შეხვედრამდე უკრაინის პრეზიდენტი ამერიკელ სენატორებსაც შეხვდა.

მნიშვნელოვანი ვიზიტით ვიმყოფები აშშ-ში. ვაშინგტონში შეერთებული შტატების სენატის ორპარტიულ დელეგაციას შევხვდი. ჩვენი დისკუსია უკრაინისადმი მიმდინარე სამხედრო დახმარებას შეეხებოდა, შესაბამის საკანონმდებლო ინიციატივებს, ჩემს შეხვედრას პრეზიდენტ ტრამპთან, ძალისხმევას, რომ მივაღწიოთ სამართლიან და მდგრად მშვიდობას, ჩვენს ხედვებს ომის დასრულებასთან დაკავშირებით, მტკიცე უსაფრთხოების გარანტიების მნიშვნელობას.

ვამაყობთ, რომ ისეთი სტრატეგიული პარტნიორები და მეგობრები გვყავს, როგორიც შეერთებული შტატებია. მადლიერები ვართ უპირობო ორპალატიანი და ორპარტიული მხარდაჭერის გამო, რასაც უკრაინა იღებს აშშ-სგან რუსეთი მთელი ამ სამწლიანი სრულმასშტაბიანი აგრესიის მანძილზე“, — დაწერა სენატორებთან შეხვედრის შესახებ პრეზიდენტმა ზელენსკიმ.