„მზად ვართ, 29-ის შემდეგაც დავრჩეთ ორბელიანების სასახლეში“ — ანა დოლიძე

კოალიცია „ძლიერი საქართველოს“ ერთ-ერთი ლიდერის, ანა დოლიძის განცხადებით, მზად არის, პრეზიდენტის სასახლეში 29 დეკემბრის შემდეგაც დარჩეს.

„მინდა გითხრათ, რომ მე შევთავაზე სრული მხარდაჭერა საქართველოს პრეზიდენტს ბრძოლაში. მზად ვართ, დავრჩეთ 29 დეკემბრის შემდეგაც სასახლეში — გამოვაცხადოთ ის ერთადერთ ადგილად, სადაც საქართველოს ლეგიტიმური პრეზიდენტი იქნება. ეს არის ჩვენი ერთ-ერთი შეთავაზება, ეს არის მხარდაჭერის ფორმა სხვა ყველა ფორმასთან ერთად, რომელსაც ჰქვია ლეგიტიმური, სამართლიანი და არაძალადობრივი“, — განაცხადა მან ჟურნალისტებთან, პრეზიდენტთან შეხვედრის შემდეგ.

მიხეილ ყაველაშვილის ინაუგურაცია სწორედ 29 დეკემბერს გაიმართება. ირაკლი კობახიძემ განაცხადა, რომ ამის შემდეგ ზურაბიშვილის და სხვა პირების ყოფნა რეზიდენცია სისხლის სამართლის დანაშაული იქნება.