მზია ამაღლობელი "ვივამედიდან" რუსთავის ციხეში დააბრუნეს

ბრალდებული ჟურნალისტის ადვოკატმა, ჯუბა ქათამაძემ რადიო თავისუფლებას უთხრა, რომ მათ რუსთავის ციხეში დაუდასტურეს დღეს საღამოს პატიმრის შეყვანის შესახებ.

მზია ამაღლობელი, რომელიც თვე-ნახევარია პატიმრობაშია, კლინიკა „ვივამედიდან“ 26 თებერვალს გაწერეს, თუმცა იგი 27 თებერვლის საღამომდე გაურკვეველი მიზეზით კლინიკაში დატოვეს.

ამაღლობელის ადვოკატის განცხადებით, დაწესებულებაში გადაყვანას კატეგორიულად მოითხოვდა თავად მზიაც.

მზია ამაღლობელის საქმე

მზია ამაღლობელი ბათუმის პოლიციამ 11 იანვარს, გვიან საღამოს, ჯერ ადმინისტრაციული წესით დააკავა სტიკერის გაკვრის გამო, შემდეგ კი 12 იანვარს ხელახლა დააკავა, ამჯერად სისხლის სამართლის წესით, რაც, იურისტების შეფასებით, საქმის გარემოებებთან შეუთავსებელია და მხოლოდ პოლიტიკურ მოტივზე მიანიშნებს.

ჟურნალისტს პოლიციელისთვის სილის გაწვნის გამო ოთხიდან შვიდ წლამდე პატიმრობა ემუქრება. მას სინდისის პატიმრად მიიჩნევენ კოლეგები, უფლებადამცველი ორგანიზაციები, ოპოზიციონერი პოლიტიკოსები, ევროკავშირი, ათობით საერთაშორისო ორგანიზაცია და არაერთი ქვეყნის მთავრობა.

მზია ამაღლობელმა დაკავების მომენტიდან შიმშილობა დაიწყო. შიმშილობის 24-ე დღეს, ჯანმრთელობის მდგომარეობის გაუარესების გამო, ის რუსთავის მე-5, ქალთა პენიტენციური დაწესებულებიდან „ვივამედში“ გადაიყვანეს.

მზია ამაღლობელმა პროტესტის ნიშნად დაწყებული შიმშილობა 38-ე დღეს, 18 თებერვალს, შეწყვიტა და ექიმების ჩართულობით კვების აღდგენის პროცესი დაიწყო.