„მთავარი არხის“ წამყვანები YouTube-ზე გადაცემას იწყებენ

გაცემას On:Time ჰქვია და ის საზოგადოებრივ-პოლიტიკურ თემებს დაეთმობა. წამყვანები მაყურებელს უცხოეთიდან პირდაპირ ჩართვებსაც ჰპირდებიან.

„ჩვენ ვართ დებიუტანტები YouTube-ზე. ახლა ვეცნობით და ახლა ვსწავლობთ - მივიღებთ რჩევებს, რა ფორმატი აინტერესებს მაყურებელს. თავდაპირველად გავა ჩანაწერი, შემდეგ შეიძლება პირდაპირ ეთერშიც გავიდეთ“, - უთხრა ნათია გოგსაძემ რადიო თავისუფლებას.

ამ ეტაპზე გადაცემას წამყვანები საკუთარი ფინანსური რესურსის გამოყენებით წერენ და ამავდროულად ეძებენ სპონსორს საჭირო ხარჯების დასაფინანსებლად.

იმის მიუხედავად, რომ ახალ გადაცემას იწყებენ, გოგსაძე და ადეიშვილი „მთავარ არხს“ არ ტოვებენ:

„ჩვენ ტელევიზიას არ ვტოვებთ და იმის გამო, რომ იძულებითი პაუზა ამოგვევსო და ქვეყნისთვის გადამწყვეტ მომენტში არ ვყოფილიყავით გაჩუმებულები, მოვიფიქრეთ ეს ფორმატი“.

„მთავარი არხი“ შექმნილი ფინანსური კრიზის გამო აღარ მაუწყებლობს. 15 თებერვლიდან შეჩერდა ყველა ის პროგრამა, რომლებიც პირდაპირ ეთერში გადაიცემოდა, რამდენიმე კვირაში კი მაუწყებლობა შეწყდა.

„ყოველდღე დამატებით ხარჯებთან იყო დაკავშირებული. ჩვენ აღარ გვაქვს ყოველდღიური ოპერირების სახსრები“, - ეწერა არხის მიერ 15 თებერვალს გავრცელებულ განცხადებაში.

უფრო ადრე, 27 იანვარს, „მთავარმა არხმა“ გაავრცელა განცხადება, რომელშიც აღნიშნავდა, რომ არხის თანადამფუძნებელი ზაზა ოქუაშვილი „გეგმაზომიერად მიყვება რუსული რეჟიმისთვის დამახასიათებელ გზას“ და ეტაპობრივად ხურავდა არხს.

დაახლოებით ერთი თვით ადრე, 2024 წლის 25 დეკემბერს, ზაზა ოქუაშვილის წარმომადგენელმა მოქმედი გენერალური დირექტორის გადაყენებაც მოითხოვა. გიორგი ქურდაძემ წერილს დაურთო გიორგი გაბუნიას მიმოწერა არხის დამფუძნებლებთან, რომელშიც ის აღნიშნავს, რომ „იძულებული ვარ, მივიღო თანამდებობიდან გადადგომის გადაწყვეტილება“. მოთხოვნა რეესტრმა არ დააკმაყოფილა, რადგან კანონით გათვალისწინებული წესის მიხედვით არ იყო წარდგენილი.

• ტელეკომპანია „მთავარი არხი“ 2019 წლის 9 სექტემბრიდან მაუწყებლობს. ის ტელეკომპანია „რუსთავი 2-ის" ყოფილმა გენერალურმა დირექტორმა ნიკა გვარამიამ დააფუძნა.
• 2020 წლის მაისში, „მთავარი არხის“ მფლობელებმა ნიკა გვარამიამ და კახაბერ ანჯაფარიძემ წილის 40% მისცეს ზაზა ოქუაშვილის მიერ დაფუძნებულ კომპანიებს.
• 2024 წლის თებერვალში, გვარამიამ 12%-იანი წილი თავის ცოლს გადასცა და არხის გენერალური დირექტორის თანამდებობა დატოვა. გენერალური დირექტორი გახდა გიორგი გაბუნია.
• 2024 წლის მარტში, ნიკა გვარამიამ „ნაციონალური მოძრაობის“ ყოფილ თავმჯდომარე ნიკა მელიასთან ერთად შექმნა პოლიტიკური გაერთიანება „ახალი“.