“მოხალისეები გურიისთვის” – დიდთოვლობით დაზარალებული მოსახლეობის მხარდასაჭერად მოქალაქეები ერთიანდებიან

“მოხალისეები გურიისთვის” – ასე ჰქვია ფეისბუქ-ჯგუფს, რომელიც დიდთოვლობითა და სტიქიით დაზარალებული მოსახლეობის დასახმარებლად შეიქმნა.

რამდენიმე დღეა თოვს მთელი ქვეყნის მასშტაბით. თოვლის მასა განსაკუთრებით დიდია დასავლეთ საქართველოში, აჭარასა და გურიაში. სოფლების ნაწილის არ მიწოდებია ელექტროენერგია, გაზი, ჩაკეტილია გზები.

“გურია ნიუსის” ინფორმაციით, დიდთოვლობას ოზურგეთის მუნიციპალიტეტში მსხვერპლი მოჰყვა. გამოცემის ცნობით, კონჭკათში დაიღუპა კაცი, რომელიც მეზობელს სახლის სახურავის თოვლისგან გაწმენდაში ეხმარებოდა.

მოხალისეები თვითორგანიზებულად ცდილობენ შექმნან ჯგუფები, რომლებიც ფიზიკურად დაეხმარებიან ჩაკეტილ სოფლებში დარჩენილ მოქალაქეებს გურიაში. ასევე, ცდილობენ ტექნიკის მობილიზებას, ფულის შეგროვებას სხვადასხვა საჭიროებისთვის, დამხმარე რესურსების მობილიზებას და ა.შ.

ოზურგეთის მუნიციპალიტეტში, შრომას თემში მყოფი მარი ჩხაიძე ვიდეო-მიმართვას ავრცელებს, სადაც ჰყვება სოფელში არსებულ სიტუაციაზე. მისი თქმით, არ აქვთ ელექტროენერგია, წყალი და ეწურებათ საჭმლის მარაგიც. ახლოს მცხოვრები მეზობლები ერთმანეთს ეხმარებიან, თუმცა მათ არ აქვთ კომუნიკაცია მეზობელ სოფლებში მცხოვრებლებზე, სადაც, სავარაუდოდ, რელიეფიდან გამომდინარე, უფრო რთული სიტუაციაა.