მსახურება აეკრძალა მღვდელს, რომელმაც ნავალნის დაკრძალვის ცერემონია გამართა

რუსეთის მართლმადიდებლური ეკლესიის მეთაურმა, პატრიარქმა კირილემ, მღვდელს, რომელმაც მარტის ბოლოს ალექსეი ნავალნის პანაშვიდი გამართა, მსახურება სამი წლით შეუჩერა.

პატრიარქ კირილეს განცხადებით, მღვდელ დიმიტრი საფრონოვს ეკრძალება კურთხევა, საეკლესიო სამოსის ტარება და ეკლესიის სამღვდელო ჯვრის ტარება 2027 წლამდე. განცხადებაში ნათქვამია, რომ ამ დროის განმავლობაში “მისი მომავალი სამღვდელოებაში გადაფასდება”.

პატრიარქის ბრძანებაში არ არის განმარტებული, რატომ შეუჩერდა საფრონოვს ღვთისმსახურება.

“მედუზის” ცნობით, საფრონოვი ნავალნის გარდაცვალებიდან 40 დღის შემდეგ ხელმძღვანელობდა მემორიალს. დაკრძალვის დაწყებამდე მან საჯაროდ მოუწოდა რუსეთის ხელისუფლებას, გადაეცათ ნავალნის ცხედარი ნავალნის დედისთვის, რადგან ოფიციალური პირები ცხრა დღის განმავლობაში ცდილობდნენ არ დაეთმოთ გარდაცვლილი პოლიტიკოსის ცხედარი.

გარდა ამისა, “მედუზის” ცნობით, რომელიც ეყრდნობა ანონიმურ ტელეგრამ არხს, საფრონოვმა უარი თქვა ეკლესიაში წაეკითხა ლოცვა ომის თემატიკაზე “ლოცვა წმინდა რუსეთის გამარჯვებისთვის”, მიუხედავად მოსკოვის ეპარქიის ბრძანებისა.

15 თებერვალს, რუსეთის სასჯელაღსრულების ფედერალური სამსახურის განცხადებით, ციხეში ოპოზიციონერი ალექსეი ნავალნი დაიღუპა.

ალექსეი ნავალნი რუსი ოპოზიციონერი პოლიტიკოსი იყო. იგი 2000-იანი წლების ბოლოდან მონაწილეობდა პოლიტიკურ ცხოვრებაში და ჰქონდა სხვადასხვა ანტიკორუფციული პროექტი. იყო ხელისუფლების საწინააღმდეგო აქციების ორგანიზატორი და მონაწილეც.

ნავალნისა და მის გუნდს გამოქვეყნებული აქვთ არაერთი გამოძიება რუსი ჩინოვნიკების კორუფციაზე, მათ შორის, ვლადიმერ პუტინისა და დიმიტრი მედვედევის შესახებ.

2018 წელს ნავალნის საპრეზიდენტო არჩევნებში სურდა მონაწილეობა, თუმცა რუსეთის ცესკომ კანდიდატად არ დაარეგისტრირა.

2020 წელს მისი მკვლელობა მოწამვლით სცადეს, რის შემდეგაც ნავალნი გერმანიაში მკურნალობდა. მასზე აღძრული სისხლის სამართლის საქმეების მიუხედავად, ნავალნი რუსეთში 2021 წლის იანვარში დაბრუნდა, ის აეროპორტშივე დააპატიმრეს. მალევე, ნავალნის „კორუფციასთან ბრძოლის ფონდი“ და მასთან დაკავშირებული სტრუქტურები ხელისუფლებამ უკანონოდ გამოაცხადა.

ციხეში ყოფნისას ნავალნი დასჯის მიზნით მუდმივად გადაჰყავდათ საჯარიმო იზოლატორში. 2023 წლის ბოლოს კი დედაქალაქისგან ასეულობით კილომეტრში, რუსეთის უკიდურეს ჩრდილოეთში არსებულ კოლონიაში გადაიყვანეს.

ალექსეი ნავალნი 1 მარტს, მოსკოვში, ბორისოვის სასაფლაოზე დაკრძალეს.