ოთხი ადამიანი დაიღუპა კრივოი როგზე რუსეთის სარაკეტო თავდასხმის შედეგად

ოთხი ადამიანი დაიღუპა უკრაინის ქალაქ კრივოი როგზე განხორციელებული სარაკეტო შეტევის შედეგად. ამის შესახებ ცნობა დნეპროპეტროვსკის რეგიონული სამხედრო ადმინისტრაციის ხელმძღვანელმა, სერგეი ლისაკმა ტელეგრამის არხით გაავრცელა.
მისივე თქმით, დაშავდა ცხრა ადამიანი. სარაკეტო დარტყმა განხორციელდა ერთ-ერთ ობიექტზე.

კრივოი როგის თავდაცვის საბჭოს თავმჯდომარემ ალექსანდრე ვილკულმა განმარტა, რომ რუსი სამხედროები ბალისტიკური რაკეტით თავს დაესხნენ სამოქალაქო ინფრასტრუქტურის ობიექტს. დარტყმის შედეგად გაჩნდა ხანძარი, ასევე დაზიანდა მრავალსართულიანი სახლი.

კრივოი როგი (უკრაინულად კრივი რიჰი) უკრაინის მთავარი ინდუსტრიული ცენტრია. იქ მდებარეობს რამდენიმე სამთო-გადამამუშავებელი და მეტალურგიული საწარმო.