ორთაჭალაში ტრაქტორი დაგორდა და სამ მანქანას დაეჯახა, ორი ადამიანი დაშავდა

ინფორმაცია, რომელიც თავდაპირველად ფეისბუკზე გაავრცელა გვერდმა „ჩემი ქალაქი მკლავს“, რადიო თავისუფლებს შსს-ში დაუდასტურეს.

შსს-ს ცნობითვე, მომხდარის შედეგად დაშავდა ორი ადამიანი. მსხვერპლი არ არის.

„ჩემი ქალაქი მკლავს“ წერს, რომ ტრაქტორი, სამი ავტომობილის გარდა, დაეჯახა ერთ ადამიანს.

შსს-ში ამას ჯერ ვერ აზუსტებენ, თუმცა ადასტურებენ, რომ მომხდარის შედეგად ორი ადამიანია დაშავებული.

ინციდენტი იმ ადგილას მოხდა, სადაც 2023 წლის 21 ნოემბერს სატვირთო ავტომობილის დაგორებას საფეხმავლო გადასასვლელთან მდგარი 15 წლის მოზარდი ემსხვერპლა.

ბეჟან კალანდაძის ციცაბო აღმართი მანქანებით ხშირად არის გადატვირთული. ასახვევში დამონტაჟებულია შუქნიშანი.

როგორც რადიო თავისუფლება მაშინ წერდა, ქუჩაზე მსუბუქ ავტომობილებთან ერთად ხშირად გადაადგილდებიან მიმდებარე მშენებლობებზე მიმავალი და მშენებლობებიდან მომავალი სატვირთო მანქანები, მათ შორის, ე.წ. ბეტონის შემრევი მანქანები, ასევე, ტრაქტორები.