“ოცნების” კანონპროექტით თეატრს სამხატვრო ხელმძღვანელის ნაცვლად დირექტორი უხელმძღვანელებს

პარლამენტში ინიციირებული კანონპროექტით, თეატრს ერთპიროვნულად უხელმძღვანელებს დირექტორი, ხოლო სამხატვრო ხელმძღვანელის, როგორც თეატრის საერთო ხელმძღვანელის თანამდებობა უქმდება.

შესაბამისი ცვლილებები „ქართულ ოცნებას“ „პროფესიული თეატრების შესახებ“ კანონში შეაქვს.

მოქმედი კანონის მიხედვით, სამხატვრო ხელმძღვანელი არის თეატრის საერთო ხელმძღვანელი, რომელიც განსაზღვრავს მის შემოქმედებით მიმართულებას და პასუხს აგებს თეატრის ფუნქციონირებაზე, ხოლო თეატრის დირექტორი, მისთვის მინიჭებული უფლებამოსილების ფარგლებში ახორციელებს ადმინისტრაციულ-ტექნიკურ, ორგანიზაციულ და ფინანსურ საქმიანობას.

„თეატრის მართვის აღნიშნული ფორმა არ არის მოქნილი და ვერ უზრუნველყოფს თანამედროვე გამოწვევების გადაჭრას, შესაბამისად, საჭიროა აღნიშნული ორი თანამდებობის გაერთიანება და თეატრის ერთპიროვნულ ხელმძღვანელად თეატრის დირექტორის განსაზღვრა, რომელიც განახორციელებს თეატრის შემოქმედებით, საფინანსო, ადმინისტრაციულ, ტექნიკურ და ორგანიზაციულ საქმიანობას… წარმოდგენილი პროექტი ითვალისწინებს თეატრის მართვის ორსაფეხურიანი მოდელის გაუქმებას, კერძოდ, თეატრს ერთპიროვნულად უხელმძღვანელებს თეატრის დირექტორი და გაუქმდება სამხატვრო ხელმძღვანელის, როგორც თეატრის საერთო ხელმძღვანელის თანამდებობა“, — ვკითხულობთ კანონპროექტის განმარტებით ბარათში.

ამასთანავე, შემოდის კონკურსის საფუძველზე დირექტორობის კანდიდატის შერჩევის შესაძლებლობა.

კანონპროექტით თეატრის დირექტორი თანამდებობაზე ნიშნავს და თანამდებობიდან ათავისუფლებს სამხატვრო ხელმძღვანელს ან მთავარ რეჟისორს, მთავარ დირიჟორს, მთავარ ბალეტმაისტერს, მთავარ ქორმაისტერს, მთავარ მხატვარს; შემოქმედებითი კოლექტივის წევრებთან დებს შრომით ხელშეკრულებებს კონკრეტული ვადით, რომლებიც შრომით-სამართლებრივი ურთიერთობის ხანგრძლივობის მიუხედავად არ ჩაითვლება უვადო ხელშეკრულებებად.