პარლამენტთან ელენე ხოშტარია სავარაუდოდ დააკავეს

პოლიციელებმა ელენე ხოშტარია დაკავების ავტომობილში ჩასვეს და გადაიყვანეს. ჯერ უცნობია, სად და რა მუხლით არის დაკავებული.

„მონებო! რუსებო“ - სკანდირებდნენ ხოშტარიას დაკავებისას დემონსტრანტები.

რადიო თავისუფლება ცდილობს შსს-სთან დეტალების დაზუსტებას. ინფორმაცია განახლდება.

მცირე ხნით ადრე პოლიციამ პარლამენტთან ორი მოქალაქე დააკავა. ერთ-ერთ დაკავებულს, თაკო კურატიშვილს, 9 აპრილის ქუჩაზე, პარლამენტის გვერდით მდებარე ტროტუარზე, ხელში საპროტესტო პლაკატი ეჭირა წარწერით: „ანწუხელიძე უკვდავია“.

ამ დროს მასთან მოულოდნელად მივიდა რამდენიმე პოლიციელი და დააკავა. მისი დახსნა ორმა აქტივისტმა სცადა, რომელთაგან ერთ-ერთი, ლილუ შაველაშვილი, პოლიციამ იქვე დააკავა.

დღევანდელი დემონსტრაცია, - რომელიც 2024 წლის 28 ნოემბრიდან დაწყებული აქციების ნაწილია, - ასევე უკავშირდება „ქართული ოცნების“ პარლამენტში საგამოძიებო კომისიას, სადაც 2008 წლის ომის ფიგურანტი სამხედრო მაღალჩინოსნები იკითხებიან.