პიროტექნიკის გამოყენების შემდეგ, პოლიცია დემონსტრანტებს „შესაბამისი რეაგირებით“ ემუქრება

შინაგან საქმეთა სამინისტრო აცხადებს, რომ „აქციის მონაწილეებს სრული შესაძლებლობა აქვთ საკუთარი პროტესტი გამოხატონ მშვიდ ვითარებაში“.

სამინისტრო აცხადებს, რომ აქციაზე პიროტექნიკის გამოყენება არის „შეკრებებისა და მანიფესტაციების შესახებ“ საქართველოს კანონის დარღვევა - ეს ცვლილებები „ქართული ოცნების“ პარლამენტმა დეკემბერში მიიღო და ხელი მეექვსე პრეზიდენტმა მიხეილ ყაველაშვილმა მოაწერა.

„მოვუწოდებთ აქციის ორგანიზატორებს და მონაწილე პირებს, პროტესტი გამოხატონ კანონით დადგენილ ფარგლებში. პოლიციის მხრიდან, თითოეულ სამართალდარღვევის ფაქტს შესაბამისი კანონიერი რეაგირება მოჰყვება“, - აცხადებს შსს.

31 მარტს პარლამენტის ქვედა მხარეს, რუსთაველის გამზირზე შეკრებილებიდან რამდენიმემ ისროლა პიროტექნიკა პარლამენტის სასახლის მიმართულებით. მოგვიანებით პიროტექნიკა ისროლეს პარლამენტის ზედა მხარეს, ძმები ზურაბაშვილების ქუჩიდანაც.

დემონსტრანტთა ნაწილს სახე დაფარული აქვს.

„ქართული ოცნების“ სადავო პარლამენტის მიერ მიღებული ცვლილებებით, დეკემბრიდან აკრძალულია აქციებზე როგორც სახის დაფარვა, ასევე პიროტექნიკის გამოყენება.

ადგილზე მობილიზებულები არიან პოლიციის თანამშრომლებიც, - როგორც უკანა შესასვლელთან, ასევე ძმები ზუბალაშვილების ქუჩის გადაღმა, ოლივერ ვორდროპის ბაღში.