პოლონეთის ცნობები ადასტურებს უკრაინისთვის აშშ-ის დახმარების შეჩერებას

პოლონეთის პრემიერ-მინისტრ დონალდ ტუსკის განცხადებით, საზღვრიდან მომავალი ცნობები ადასტურებს ინფორმაციას უკრაინისთვის განკუთვნილი ამერიკული სამხედრო დახმარების შეჩერების შესახებ.

ამერიკული მედიის ინფორმაციით, აშშ-ის პრეზიდენტმა დონალდ ტრამპმა უკრაინისთვის ყველანაირი სამხედრო დახმარების მიწოდება დააპაუზა და უკრაინას ამჟამად არც იმ იარაღს მიაწვდიან, რომელიც ტრანზიტისთვის გამზადებულია პოლონეთში.

„საზღვრიდან, იაშონკაში ჩვენი ცენტრიდან მომდინარე ცნობები ადასტურებს ამერიკული მხარის განცხადებებს. ეს ევროპას, უკრაინას, პოლონეთს გაცილებით რთულ სიტუაციაში აყენებს, მაგრამ ჩვენ უნდა გავუმკლავდეთ ამ სიტუაციას“, — განაცხადა ტუსკმა მთავრობის სხდომაზე.

თეთრ სახლს ოფიციალურად არ განუცხადებია უკრაინისვის სამხედრო დახმარების შეჩერების შესახებ. მედიის ცნობით, პაუზა გაგრძელდება მანამ, სანამ დონალდ ტრამპი არ დაინახავს, რომ უკრაინის ლიდერები „მოწადინებული არიან მშვიდობისთვის”.

უკრაინისთვის პრეზიდენტის მრჩეველმა მიხაილო პოდოლიაკმა განაცხადა, რომ ჯერ გასარკვევია, რომელი პროგრამები შეწყვეტს მუშაობას იმის გათვალისწინებით, რომ ბევრი ისედაც დასრულების ეტაპზე იყო. ამასთან, ბევრ შემთხვევაში საჭიროა კენჭისყრა კონგრესში.

„არ დაგვავიწყდეს, რომ უკრაინას უკვე აქვს აშშ-სგან სამხედრო მხარდაჭერის პროგრამების გრძელვადიანი შეჩერების გამოცდილება და იცის, როგორ მოერგოს ასეთ სიტუაციებს. ამიტომ, ჩვენ ვატარებთ საფუძვლიან აუდიტს, თუ რა გვაქვს, რა შეიძლება განვითარდეს პარტნიორული თანამშრომლობის ფარგლებში, რა შეიძლება შეიცვალოს. ვეძებთ რაღაცას კომერციულ ბაზრებზე. განვიხილავთ ევროპელ პარტნიორებთან. და მაინც არ უგულებელვყოფთ ჩვენს ამერიკელ პარტნიორებთან მოლაპარაკების შესაძლებლობას“, — თქვა პოდოლიაკმა.

უკრაინის პრემიერ-მინისტრმა დენის შმიგალმა კი განაცხადა, რომ აშშ-ის მხარდაჭერა გრძელდება და  მომავალშიც მისი გაგრძელების იმედი აქვთ.