პუტინის სპეცწარმომადგენელმა ვაშინგტონში მოლაპარაკება გამართა ტრამპის სპეცწარმომადგენელთან

რუსეთის პირდაპირი ინვესტიციების ფონდის ხელმძღვანელმა კირილ დმიტრიევმა, რომელიც უცხოეთის ქვეყნებთან საინვესტიციო-ეკონომიკური თანამშრომლობის საკითხებში პრეზიდენტ პუტინის სპეციალური წარმომადგენელიცაა, ვაშინგტონში მოლაპარაკება გამართა აშშ-ის პრეზიდენტის სპეციალურ წარმომადგენელ სტივ უიტკოფთან.

შეხვედრა 2 აპრილს გაიმართა, რაც ინფორმირებულმა წყაროებმა დაუდასტურეს სააგენტო Reuters-ს და გამოცემა The Washington Post-ს.

მოლაპარაკების შინაარსი ჯერჯერობით უცნობია.

დმიტრიევმა ვაშინგტონში ჩასვლის შემდეგ სოციალურ ქსელ X-ში გამოაქვეყნა მოკლე პოსტი, რომ პოლიტიკის მიუხედავად აშშ-სა და რუსეთს შორის დიალოგი მნიშვნელოვანია და საუბარია ყველასთვის უფრო უსაფრთხო და აყვავებული მსოფლიოს მშენებლობაზე.

კირილ დმიტრიევი პირველი რუსი მაღალჩინოსანია, რომელიც უკრაინაში ომის დაწყების შემდეგ ვაშინგტონში ვიზიტით ჩავიდა. ის აშშ-ის მიერ სანქცირებულთა სიაშია რუსეთის ხელისუფლების სხვა წარმომადგენლებთან ერთად.

ტელეკომპანია CNN-ის წყაროთა ინფორმაციით, იმისთვის, რომ დმიტრიევი ვაშინგტონში ჩასულიყო, შეერთებულმა შტატებმა დროებით შეაჩერა მის წინააღმდეგ სანქციების მოქმედება.

დმიტრიევი მონაწილეობდა რუსეთისა და აშშ-ის დელეგაციების შეხვედრაში, რომელიც თებერვალში საუდის არაბეთში გაიმართა.

კირილ დმიტრიევი აშშ-ის პრეზიდენტის სპეციალურ წარმომადგენელთან, სტივ უიტკოფთან ერთად ჩართული იყო ნარკოდანაშაულის ბრალდებით რუსეთში 2021 წლის ზაფხულში დაკავებული ამერიკელი მასწავლებლის, მარკ ფოგელის გათავისუფლების პროცესში. ფოგელი, რომელსაც 14-წლიანი პატიმრობა ჰქონდა მისჯილი, 2025 წლის თებერვალში გაათავისუფლეს.

როგორც Reuters-ი წერს, სტენფორდის უნივერსიტეტის კურსამთავრებულ კირილ დმიტრიევს, რომელიც წლების წინ ამერიკული საინვესტიციო ბანკის, Goldman Sachs-ის ბანკირიც იყო, მჭიდრო კავშირები აქვს პრეზიდენტ ტრამპის ადმინისტრაციის წარმომადგენლებთან.

49 წლის დმიტრიევი კიევშია დაბადებული.