რაზე შეთანხმდნენ ტრამპის ადმინისტრაცია და კიევი

სხვადასხვა ამერიკული და უკრაინული მედიასაშუალების მიერ გავრცელებული ინფორმაციის თანახმად, თეთრ სახლსა და კიევს შორის მინერალების და რესურსების საკითხზე შეთანხმება შედგა და დოკუმენტზე ხელმოწერა უახლოეს პერიოდში განხორციელდება.

მხარეები შეთანხმდნენ, რომ ერთობლივად შექმნიან ფონდს, რომელიც გამოყენებული იქნება უკრაინის ეკონომიკის აღდგენისთვის. ამ ფონდში აკუმულირდება უკრაინის ბუნებრივი რესურსების მნიშვნელოვანი წილი.

მედიაში გავრცელებული ინფორმაციით, უკრაინის ბუნებრივი რესურსების პოტენციური შემოსავლიდან, ამერიკის 500-მილიარდიანი წილი, რომლის შესახებაც დონალდ ტრამპი საუბრობდა, ახლა აღარ არის რელევანტური. ამჟამინდელ შეთანხმებაში ამერიკის წილმა მკვეთრად დაიწია, თუმცა ის არც იმას ითვალისწინებს, რასაც ვოლოდიმირ ზელენსკი დიდი ხანია ითხოვს – უსაფრთხოების გარანტიებს.

“გარიგების ახალი პუნქტები ბევრად უკეთესია უკრაინისთვის”, – BBC-ის თანახმად ამბობს წყარო უკრაინის პრეზიდენტის ოფისიდან.

“ეს არის ის რასაც მე ვაკეთებ. მე ვაკეთებ შეთანხმებებს”, – განაცხადა დონალდ ტრამპმა იმის დადასტურების გარეშე, რომ შეთანხმება საბოლოოდ მიღწეულია. “მთელი ჩემი ცხოვრება შეთანხმებებია”.

ტრამპის თქმით, ზელენსკი შესაძლოა პარასკევსვე ჩავიდეს ვაშინგტონში, სადაც შეთანხმებას მოაწერენ ხელს.

ამერიკის პრეზიდენტის განცხადებით, მინერალებზე შეთანხმება უკრაინას აძლევს უფლებას “განაგრძოს ბრძოლა”.

“350 მლრდ დოლარი, სამხედრო აღჭურვილობა და უფლება, რომ განაგრძოს ბრძოლა”, – განაცხადა ტრამპმა საპასუხოდ კითხვისა, რას იღებს უკრაინა შეთანხმების სანაცვლოდ.

“ამერიკის, ამერიკული ფულისა და აღჭურვილობის გარეშე ეს ომი ძალიან მალე დასრულდებოდა”, – განაცხადა ტრამპმა და დასძინა, რომ რუსეთსა და უკრაინას შორის სამშვიდობო შეთანხმება საჭიროებს უკრაინაში გარკვეულ ფორმის სამშვიდობო მისიას.

ტრამპის თქმით, მინერალების შეთანხმების მთავარი გზავნილია, რომ ამერიკელები ეხმარებიან ქვეყანას რთული პრობლემის გადაჭრაში, მაგრამ გადასახადის გადამხდელი, თავის ფულს უკან დაიბრუნებს”.

ამერიკული კომპანიების მიერ არის დადასტურებული, რომ უკრაინის მიწაში არსებობს კრიტიკული მინერალები, მათ შორის ლითიუმი, რომლის მოპოვების შემთხვევაშიც ქვეყანა დიდ ფულს იშოვის. ლითიუმი ელექტრომანქანების ბატარეების უმთავრესი ელემენტია.