რატომ ინიშნება სუს-ის ყოფილი უფროსი რეგიონული განვითარების მინისტრად - რას ამბობენ

ყოფილი თავდაცვის მინისტრი და არასამათავრობო ორგანიზაცია „სამოქალაქო იდეის“ ხელმძღვანელი, თინა ხიდაშელი მიიჩნევს, რომ ამ საკადრო ცვლილების მიზანი „არჩევნების სამინისტროს“ შექმნაა:

„სინამდვილეში არჩევნების სამინისტრო შექმნეს, და ზუსტად ის კაცი დაუნიშნეს მინისტრად რომელსაც ბოლოს ზუსტად ეს საქმე ქონდა დავალებული, საარჩევნოდ რეგიონების უზრუნველყოფა...

მთავარი კითხვა: რას აკეთებს ოპოზიციური სპექტრი? რას უპირისპირებს ხელისუფლების მკვეთრ, ერთმნიშვნელოვნად საარჩევნო გადაწყვეტილებას?“

გიორგი გახარიას პრემიერ-მინისტრობის დროს საქართველოს მთავრობის ადმინისტრაციის ხელმძღვანელი და ახლა პარტია „გახარია - საქართველოსთვის“ ერთ-ერთი ლიდერი, ნათია მეზვრიშვილი მიზანი „კორუფციული გარიგებების სრულ მონოპოლიზებაა“:

„ოცნების“ ამ გადაწყვეტილებასთან პირდაპირ კავშირშია ასევე ორი დღის წინ დაანონსებული თითქოსდა მთავრობის ეფექტიანობის დეპარტამენტის შექმნა, რომლის მიზანი კორუფციის ცენტრალიზებაა და არა ეფექტიანობის უზრუნველყოფა ან კორუფციის წინააღმდეგ ბრძოლა... ამ ნაბიჯით ივანიშვილი ახდენს კორუფციული გარიგებების (როგორც მისი ძალაუფლების წყაროს) სრულ მონოპოლიზებას“.

„ქართული ოცნების“ ერთ-ერთი ლიდერი, გია ვოლსკი ამბობს, რომ მთავრობაში მიმდინარე საკადრო ცვლილებები პოზიტიურად უნდა შეფასდეს:

„რასაკვირველია, მართვის სისტემა განახლებას მოითხოვს. მშვენიერი საკადრო შემადგენლობა გვყავს „ქართულ ოცნებას“ - ინტელექტუალური, კარგი ავტორიტეტის, დიდი გამოცდილების მქონე ადამიანები და ძალიან საინტერესო ცვლილებები ხორციელდება... იქმნება უწყება [რეგიონული განვითარების სამინისტრო], რომელიც იქნება ერთ-ერთი წარმმართავი იმ ვითარების, რომელიც საქართველოში არსებულ ხვალინდელ დღეს განაპირობებს და აქ ადამიანის გადაყვანა სწორედაც პოზიტიურად უნდა შეფასდეს“.

გრიგოლ ლილუაშვილი სუს-ის ხელმძღვანელად 2019 წლის ოქტომბერში აირჩიეს, მას ვადა 6 წლისთავზე, 2025 წლის ოქტომბერში ეწურებოდა, როცა საქართველოში თვითმმართველობის არჩევნები უნდა ჩატარდეს. უფრო ადრე ლილუაშვილი იყო სუს-ის უფროსის მოადგილე, პარლამენტში იკავებდა რეგიონული პოლიტიკისა და თვითმმართველობის კომიტეტის თავმჯდომარის თანამდებობაზე, უმუშავია თბილისის მერიასა და „ქართუ ბანკში“.