4 hours ago
2
რუმინეთის პროკურატურამ დაპატიმრების ორდერი გასცა ექვს პირზე, რომლებიც ბრალდებულნი არიან დანაშაულებრივი ჯგუფის შექმნასა და სახელმწიფო ღალატში. როგორც რადიო თავისუფლების რუმინული სამსახური წერს, გამოძიების თანახმად, ქვეყნის პოლიტიკური დესტაბილიზაციისა და თავდაცვისუნარიანობის შესუსტების გზით ისინი ცდილობდნენ ძირი გამოეთხარათ
რუმინეთის სუვერენიტეტისა და დამოუკიდებლობისთვის.
გამომძიებლებმა დაადგინეს, რომ ხუთმა ბრალდებულმა დანაშაულებრივი ჯგუფი ჯერ კიდევ 2023 წელს შექმნა. 2024 წელს კი მათ შეუერთდა მეექვსე წევრი.
რადიო თავისუფლების რუმინული სამსახურის წყაროების თანახმად, ამ ჯგუფს ეწოდება "ვლად ცეპეშის" სარდლობის გენერალურ შტაბი". ჯგუფის ხელმძღვანელად სახელდება 101 წლის გენერალი რადუ თეოდორი, რომელიც ერთ-ერთია ამ ექვს ბრალდებულთაგან.
"საკუთარი მიზნის მისაღწევად ჯგუფის ყველა წევრი უწყვეტ, შეგნებულ, საჯარო და ფარულ საქმიანობას ეწეოდა. გარდა ამისა, ჯგუფის წევრები კონტაქტში შედიოდნენ უცხოეთის სახელმწიფოების აგენტებთან, რომლებიც მოქმედებდნენ როგორც რუმინეთის ტერიტორიაზე, ისე რუსეთის ფედერაციის ტერიტორიაზე", - ნათქვამია რუმინეთის ორგანიზებული დანაშაულის და ტერორიზმის დანაშაულის გამომძიებელი დირექტორატის განცხადებაში.
პროკურატურის ინფორმაციით, იანვარში ორი ბრალდებული მოსკოვში გაემგზავრა, სადაც იმ ადამიანებს გაესაუბრა, რომლებიც მზად იყვნენ მხარი დაეჭირათ რუმინეთში ხელისუფლების ხელში ჩაგდების მცდელობისთვის.
გამოძიების ფარგლებში რვა ჩხრეკა ჩატარდა რუმინეთის სხვადასხვა რეგიონში. 6 მარტს ბუქარესტის სააპელაციო სასამართლომ უნდა გადაწყვიტოს ოთხი ბრალდებულის საპატიმროში გაგზავნა და დანარჩენი ორისთვის შინაპატიმრობის მისჯა.
ერთი დღით ადრე რუმინეთის საგარეო საქმეთა სამინისტრომ რუსეთის საელჩოს სამხედრო ატაშე და მისი თანაშემწე პერსონა ნონ გრატად გამოაცხადა და მათ ქვეყნის დაუყოვნებლივ დატოვება უბრძანა. რუსეთის სამხედრო ატაშეს პოსტი ეკავა ვიქტორ მაკოვსკის, ხოლო მისი თანაშემწე იყო ევგენი იგნატიევი.
რუმინეთში დანაშაულებრივი ჯგუფის წევრთა დაკავების ფონია ქვეყანაში შექმნილი რთული საზოგადოებრივი-პოლიტიკური ვითარება.
თებერვლის ბოლოს რუმინეთის გენერალურმა პროკურატურამ ყოფილ საპრეზიდენტო კანდიდატსა და ოპოზიციონერ პოლიტიკოს კალინ ჯორჯესკუს სისხლის სამართლის რამდენიმე დანაშაულში წაუყენა ბრალი. ის არჩევნებში მონაწილეობის ხელახლა მიღებისთვის საბუთების წარდგენამდე დააკავეს. წინა არჩევნების შედეგები გაუქმდა მას შემდეგ, რაც ჯორჯესკუმ გაიმარჯვა პირველ ტურში.
ჯორჯესკუ მის მიმართ გამოთქმულ ბრალდებას "შეთითხნილის" და პოლიტიკურად მოტივირებულს უწოდებს და მოითხოვს, რომ დაუშვან ის საპრეზიდენტო არჩევნების მეორე ტურზე.
English (US) · 
Georgian (GE) ·