რუსეთში საგაზაფხულო გაწვევის ფარგლებში არმიის რიგებში 160 000 წვევამდელის ჩარიცხვა იგეგმება

რუსეთის ფედერაციის ტერიტორიაზე 1 აპრილიდან დაიწყო საგაზაფხულო სამხედრო გაწვევის კამპანია, რომლის დროსაც რუსეთის არმიის 160 000 ჯარისკაცით შევსება იგეგმება. რადიო თავისუფლების რუსული სამსახურის ცნობით, მოქალაქეთა სამხედრო გაწვევის შესახებ ბრძანებას ხელი რუსეთის პრეზიდენტმა ვლადიმირ პუტინმა მოაწერა.

შედარებისათვის, თუ 2024 წლის საგაზაფხულო გაწვევის დროს რუსეთის სამხედრო უწყებაში 150 000 მოქალაქე გაიწვიეს, წელს სამხედრო კომისარიატებს მოუწევთ 10 000-ით მეტი მოქალაქის მობილიზება. ასეთი მასშტაბური გეგმის რეალიზებას რუსეთის ხელისუფლება აპირებს საკანონმდებლო ცვლილებით, რომლის თანახმად 3 წლით გაიზარდა სამხედრო ვალდებულ მოქალაქეთა ასაკი. კერძოდ, რუსეთის სამხედრო კომისარიატები არმიაში გამოძახების უწყებას 18-დან 30-წლამდე მოქალაქეებს გაუგზავნიან. მანამდე გაწვევა 18-დან 27 წლამდე ასაკის მოქალაქეებს ეხებოდათ.

სამხედრო სავალდებულო სამსახურის ასაკი რუსეთში კვლავ 12 თვეა. რუსეთში კანონით განსაზღვრული ალტერნატიული სამოქალაქო სამსახურის გავლაც, რომელიც 21 თვეს შეადგენს.

სამხედრო გაწვევა, რომელიც 1 აპრილიდან 15 ივნისამდე გასტანს, ყველაზე მასშტაბური იქნება ბოლო 14 წლის განმავლობაში, რასაც სამხედრო მიმომხილველები რუსეთის მიერ უკრაინაში მიმდინარე სამხედრო ოპერაციას უკავშირებენ.

რუსეთის ხელისუფლება სამხედრო გაწვევას არ უკავშირებს სპეციალურ სამხედრო ოპერაციას უკრაინაში (ასე უწოდებს კრემლი ფართომასშტაბიან ომს უკრაინის წინააღმდეგ.-რედ) და კვლავ ამტკიცებს, რომ წვევამდელებს არ გზავნის ფრონტის ხაზზე.

2022 წლის მარტში, უკრაინაში სრულმასშტაბიანი შეჭრის ბრძანების გაცემიდან რამდენიმე კვირის შემდეგ, რუსეთის პრეზიდენტმა ვლადიმირ პუტინმა პირობა დაუდო „დედებს, ცოლებს, დებსა და საცოლეებს“, რომ ბრძოლაში გაგზავნიდა მხოლოდ „პროფესიონალ სამხედრო პერსონალს“.

რუსულენოვანი საინფორმაციო გამოშვება „ვიორსტკა“ იტყობინება, რომ სულ მცირე 25 წვევამდელი დაიღუპა რუსეთის კურსკის რეგიონში, სადაც აგვისტოში უკრაინა მოულოდნელად შეიჭრა.