რჩევები მათთვის, ვისაც გერმანიაში ბინის ქირაობა უნდა – როგორ მოვძებნოთ იდეალური ვარიანტი

გერმანიაში გასაქირავებელ ბინებზე დიდი მოთხოვნაა და მსურველებისთვის იდეალური ვარიანტის მოძებნა არც ისე ადვილია. საინტერესო ფაქტია, რომ ბინის ქირაობა ყველაზე ძვირი არა ბერლინში, არამედ მიუნხენსა და ფრანკფურტშია.

როგორ უნდა მოძებნოთ დასაქირავებელი ბინა?

არსებობს რამდენიმე ძირითადი გზა საცხოვრებლის მოსაძებნად. კერძოდ, შეგიძლიათ მიმართოთ უძრავი ქონების აგენტებს, თუმცა მათი მომსახურება ძალიან ძვირია და დაახლოებით 2-3 თვის ბინის ქირის ფასია.

უფრო იაფი დაგიჯდებათ ბინის მოძებნა ნაცნობების მეშვეობით, ბევრი მფლობელი ხომ ბინას განცხადებების გარეშე აქირავებს. თუ ამ მხრივაც არ გაგიმართლათ, მაშინ დამოუკიდებლად უნდა ეძებოთ სპეციალურ საიტებზე.

გერმანიაში ბინის დაქირავებისთვის ყველაზე პოპულარული პლატფორმებია:

• Immobilienscout24 – უძრავი ქონების ყველაზე დიდი საიტი;
• WG-Gesucht – ეს საიტი სპეციალიზებულია ოთახების გაქირავებასა და ერთობლივ საცხოვრებელზე;
• Immowelt – გასაქირავებელი ბინების შესახებ ინფორმაციის კიდევ ერთი სოლიდური საიტი;
• eBay Kleinanzeigen – ამ საიტზე გამქირავებლების კერძო განცხადებებია განთავსებული.

ამას გარდა, კარგი ვარიანტია კერძო განცხადებების მოძებნა კონკრეტული ქალაქის ფეისბუქჯგუფებში, თუმცა ძალიან ფრთხილად უნდა იყოთ, რომ თაღლითების მახეში არ გაებათ.

დაიმახსოვრეთ: გერმანიაში ბინის გამქირავებლები არასდროს ითხოვენ ავანსს მანამ, სანამ მომავალი მდგმური ბინას არ ნახავს!

ბინის დაქირავების ფასები გერმანიაში

გასაქირავებელი ბინის ფასი დამოკიდებულია ქალაქზე, რაიონსა და საცხოვრებლის ტიპზე. მაგ., დიდ ქალაქებში ერთოთახიანი ბინის დაქირავების ფასი კომუნალური გადასახადების გარეშე შეიძლება 900-იდან 2000 ევრომდე მერყეობდეს.

დიდ ქალაქებში ავეჯით გაწყობილი ერთოთახიანი ბინის დაქირავების საშუალო ფასები:

ბერლინი:  900 – 1400 ევრო

მიუნხენი: 1200 – 2000 ევრო

ფრანკფურტი: 1 100 – 1 700 ევრო

ლაიფციგი: 600 – 900 ევრო

გარეუბნებში ფასები გაცილებით დაბალია, ვიდრე ცენტრში, აგრეთვე, მნიშვნელოვნად ნაკლებია ისეთი ბინის ქირა, სადაც ავეჯი არ არის. მაგ., ბერლინში შეგიძლიათ თვეში 500-700 ევროდ იშოვოთ ბინა ავეჯის გარეშე.

აგრეთვე, ბინის ქირა დამოკიდებულია იმაზეც, შედის თუ არა მასში კომუნალური გადასახადები. არსებობს ქირის ორი ტიპი: kaltmiete – ქირა კომუნალური გადასახადების გარეშე, აგრეთვე, warmmiete – კომუნალური გადასახადები უკვე შედის ბინის ქირაში. ეს ყოველთვის უნდა გაითვალისწინოთ, რომ შემდეგ გაუგებრობა არ მოხდეს.

აუცილებელი დოკუმენტები

იმისათვის,რომ ბინის დაქირავების შანსები გაზარდოთ, უნდა მოამზადოთ შემდეგი დოკუმენტები:

• საკრედიტო რეიტინგი  (Schufa-Auskunft). მისი მიღება შეგიძლიათ საიტზე meineschufa.de;
• ცნობა, რომ წინა გამქირავებელთან არანაირი ვალი არ გაქვთ (Mietschuldenfreiheitsbescheinigung);
• შემოსავლების ცნობა (Gehaltsnachweise). თუ სტაბილური შემოსავალი არ გაქვთ, შესაძლოა დაგჭირდეთ  ადამიანი, რომელიც თავდებში დაგიდგებათ (Bürge);
• პასპორტის ან ცხოვრების უფლების ასლი;
• სამოტივაციო წერილი – რამდენადაც მოთხოვნა დიდია, ზოგიერთ შემთხვევაში სამოტივაციო წერილი ეხმარება ადამიანს, რომ სხვა პრეტენდენტებისგან გამოირჩეოდეს.

გაითვალისწინეთ, რომ თქვენ გარდა უამრავი მსურველია და გასაქირავებელ ბინებს მათაც აჩვენებენ, ამიტომ გადაწყვეტილება სწრაფად უნდა მიიღოთ, თორემ სანამ თქვენ ფიქრობთ, შეიძლება ბინა გაქირავდეს – დიდხანს არავინ დაგელოდებათ.

ნინო ხოშტარია

დაკავშირებულ თემაზე: მუშაობა გერმანიაში – რას ელოდებიან უცხოელი სპეციალისტები და რას იღებენ საბოლოო ჯამში?

მუშაობა გერმანიაში – რას ელოდებიან უცხოელი სპეციალისტები და რას იღებენ საბოლოო ჯამში?