9 hours ago
4
26 აპრილს ირანის უდიდეს კომერციულ პორტში, შაჰიდ რაჯაის მონაკვეთზე, ძლიერი აფეთქება მოხდა, რის შედეგადაც სულ მცირე 18 ადამიანი დაიღუპა და 700-ზე მეტი დაშავდა.
აფეთქება პორტის იმ ნაწილში მოხდა, სადაც ქიმიური ნივთიერებების კონტეინერები ინახებოდა. შედეგად, ძლიერი ხანძარი გაჩნდა, რომელიც რამდენიმე საათის განმავლობაში გაგრძელდა. აფეთქების ხმა რამდენიმე კილომეტრის რადიუსში ისმოდა, მათ შორის ბანდარ აბასში და კუნძულ კეშმზეც.
ირანის კრიზისების მართვის ორგანიზაციის წარმომადგენლის, ჰოსეინ ზაფარის თქმით, აფეთქება სავარაუდოდ ქიმიკატების არასწორმა შენახვამ გამოიწვია. თუმცა, ზოგიერთი ექსპერტი მიიჩნევს, რომ აფეთქების მიზეზი შესაძლოა სარაკეტო საწვავში გამოყენებული ნივთიერება ყოფილიყო.
აფეთქების შედეგად დაზიანდა მიმდებარე ინფრასტრუქტურა, მათ შორის შენობების ფანჯრები და სატრანსპორტო საშუალებები.
ამჟამად მიმდინარეობს ევაკუაცია და დაშავებულების სამედიცინო დაწესებულებებში გადაყვანა. ადგილზე მუშაობენ საგანგებო სიტუაციების სამსახურის თანამშრომლები, რომლებიც ხანძარს ამ დრომდე ებრძვიან.
როიტერის ცნობით, აფეთქება მაშინ მოხდა, როცა ირანი აშშ-სთან ბირთვული მოლაპარაკებების მესამე რაუნდს იწყებდა ომანში, „თუმცა ამ ორ მოვლენას შორის კავშირის არსებობა არ დასტურდება“, -წერს გამოცემა.
ბოლო წლების განმავლობაში ირანში ენერგეტიკულ და ინდუსტრიულ ინფრასტრუქტურაზე არაერთი მომაკვდინებელი ინციდენტი მოხდა, რომელთაგან ბევრის მიზეზად დაუდევრობა სახელდებოდა.
ამ შემთხვევებს შორის იყო ნავთობსაწარმოებში გაჩენილი ხანძრები, ქვანახშირის მაღაროში გაზის აფეთქება და 2023 წელს ბანდარ-აბასში გადაუდებელი სარემონტო სამუშაოებისას მომხდარი შემთხვევა, რომელმაც ერთი მუშის სიცოცხლე შეიწირა.
English (US) · 
Georgian (GE) ·