საპასუხო ზომები, მოლაპარაკებებისკენ მოწოდება - მსოფლიო ტრამპის ტარიფებზე რეაგირებს

აშშ-ის პრეზიდენტ დონალდ ტრამპის გადაწყვეტილებას, ტარიფები დაუწესოს უცხოეთის სახელმწიფოებს, მათგან მოჰყვა მკვეთრად უარყოფითი რეაქციები. არაერთი ქვეყანა საპასუხო ზომებით იმუქრება. არის მოლპარაკებებისკენ მოწოდებებიც.

ევროკომისიის პრეზიდენტმა ურზულა ფონ დერ ლაიენმა განაცხადა, რომ პრეზიდენტ ტრამპის გადაწყვეტილება მსოფლიო ეკონომიკისთვის სერიოზული დარტყმაა და საშინელი შედეგები ექნება მილიონობით ადამიანისთვის. ფონ დერ ლაიენის თანახმად, გაძვირდება პროდუქტები, მედიკამენტები და ტრანსპორტი და ინფლაციის ზრდა განსაკუთრებით მტკივნეული იქნება მოსახლეობის მოწყვლადი ფენებისთვის.

ევროკომისიის პრეზიდენტის განცხადებით, ტარიფები პირველივე დღიდან დააზარალებს ყველა საწარმოს.

ფონ დერ ლაიენი ხაზს უსვამს, რომ ევროპასა და აშშ-ს შორის ვაჭრობამ ბოლო ათწლეულებში მილიონობით სამუშაო ადგილი შექმნა და მომხმარებლებმა მთელ მსოფლიოში ისარგებლეს ფასების შემცირებით.

ამასთან, ევროკომისიის პრეზიდენტი აღნიშნავს, რომ გლობალურ სავაჭრო სისტემას სერიოზული ხარვეზები აქვს და ეთანხმება აშშ-ის პრეზიდენტს, რომ არსებული წესებით სხვები უსამართლოდ სარგებლობენ, ამიტომ მზად არის მხარი დაუჭიროს ნებისმიერ ძალისხმევას, რომელიც მიმართული იქნება მსოფლიო ეკონომიკის რეალიებთან გლობალური სავაჭრო სისტემის შესაბამისობაში მოყვანისკენ.

ფონ დერ ლაიენის განცხადებით, ევროკავშირი ყოველთვის მზად იყო აშშ-თან მოლაპარაკებისთვის და ამასთან, მზად არის საპასუხო ზომებისთვისაც. ევროკომისიის პრეზიდენტის ინფორმაციით, დასრულების ეტაპზეა პირველი პაკეტი, რომელიც ფოლადის იმპორტზე ტარიფის დაწესების კონტრზომებს მოიცავს და ამზადებენ შემდეგ ნაბიჯებსაც, რათა მოლაპარაკებების ჩაშლის შემთხვევაში დაიცვან საკუთარი ინტერესები და ბიზნესი.

ფონ დერ ლაიენის მოწოდებაა კონფრონტაციიდან მოლაპარაკებებზე გადასვლა. აშშ-ის პრეზიდენტის გადაწყვეტილებით, ჯერ კიდევ მარტიდან ამოქმედდა 25%-იანი გადასახადი იმპორტირებულ ფოლადსა და ალუმინზე. 2 აპრილს დონალდ ტრამპმა გამოაცხადა, რომ ევროკავშირიდან იმპორტირებული პროდუქცია 20%-ით დაიბეგრება.

კანადის პრემიერ-მინისტრ მარკ კარნის განცხადებით, აშშ-ის პრეზიდენტ დონალდ ტრამპის ტარიფები ძირეულად შეცვლის საერთაშორისო სავაჭრო სისტემას. 2 აპრილს კარნიმ ჟურნალისტებს უთხრა, რომ ტარიფებს საპასუხო ზომებით შეებრძოლებიან. შეერთებულმა შტატებმა კანადიდან იმპორტირებული ფოლადი და ალუმინი ჯერ კიდევ მარტში დაბეგრა.

ავსტრალიის პრემიერ-მინისტრმა ენტონი ალბანიზმა განაცხადა, რომ აშშ-ის ადმინისტრაციის ტარიფებს ლოგიკური საფუძველი არ აქვს, მეგობრული საქციელი არ არის და ეწინააღმდეგება ორი ქვეყნის პარტნიორობას. აშშ ავსტრალიას 10%-იან ტარიფს უწესებს. ავსტრალიის პრემიერის თანახმად, გაუმართლებელი ტარიფები ყველაზე ძვირად ამერიკელ ხალხს დაუჯდება, ამიტომ საპასუხო ზომებს არ მიმართავენ.

საპასუხო ნაბიჯების სწრაფად განსაზღვრას აპირებს შვეიცარია, რომელსაც პრეზიდენტ ტრამპის გადაწყვეტილებით 31%-იანი ტარიფი დაუწესდა. შვეიცარიის პრეზიდენტმა კარინ კელერ-ზუტერმა განაცხადა, რომ საპასუხო ზომების შემუშავებისას ყურადღება ეთმობა ქვეყნის გრძელვადიან ეკონომიკურ ინტერესებს. მისივე თქმით, საერთაშორისო სამართლისადმი ერთგულება და თავისუფალი ვაჭრობა ძირითად ფასეულობებად რჩება.

აშშ-ის პრეზიდენტის გადაწყვეტილება დაგმო ჩინეთმა. ტრამპის ადინისტრაციამ ჩინეთისთვის 34%-იანი ტარიფი დაადგინა.

ჩინეთის ვაჭრობის სამინისტროს განცხადებით, საკუთარი ინტერესებისა და უფლებების დასაცავად კონტრზომებს მიმართავენ. ჩინეთი მიიჩნევს, რომ ტრამპის პროტექციონიზმი აზიანებს ამერიკის ინტერესებსაც და საფრთხეს უქმნის გლობალურ ეკონომიკურ განვითარებას. ჩინეთის ვაჭრობის სამინისტროს თანახმად, სავაჭრო ომში ვერავინ გაიმარჯვებს, ამიტომ აშშ-ს მოუწოდებენ, ცალმხრივ ტარიფებზე უარი თქვას და სავაჭრო პარტნიორებთან უთანხმოებები თანასწორი დიალოგის გზით მოაგვაროს.

2 აპრილს აშშ-ის პრეზიდენტმა გამოაცხადა, რომ მსოფლიოს ქვეყნებს უწესებს საპასუხო საბაჟო გადასახადებს. მინიმალური ტარიფი 10%-ია, მათ შორის საქართველოსთვის.

ტარიფები ყველაზე მაღალია(46-დან 49%-მდე) ვიეტნამის, ლაოსისა და კამბოჯისთვის.

როგორც დონალდ ტრამპმა თქვა, აშშ-ს 50 წელიწადზე მეტხანს ძარცვავდნენ, რაც აღარ მოხდება. თეთრი სახლის ბაღში 2 აპრილს გამართულ ბრიფინგზე ტრამპმა განაცხადა, რომ ეს არის „გათავისუფლების დღე" და „ამერიკული ეკონომიკის დამოუკიდებლობის დეკლარაცია".

აშშ-ის პრეზიდენტი ტარიფებს მიიჩნევს სხვა სახელმწიფოებზე ზეწოლის, სავაჭრო ბალანსის დაცვისა და ამერიკის ეკონომიკის გაძლიერების საშუალებად. ეკონომისტების შეფასებით, მსგავსი გადაწყვეტილებები რეცესიას და ფასების ზრდას გამოიწვევს და უარყოფითად აისახება ამერიკელებზეც.