საუდის არაბეთში დაიწყო აშშ-ისა და უკრაინის წარმომადგენლებს შორის მოლაპარაკებები

საუდის არაბეთის დედაქალაქ ერ-რიადში დაიწყო აშშ-სა და უკრაინის წარმომადგენლებს შორის შეხვედრა. ამის შესახებ უკრაინის თავდაცვის მინისტრმა რუსტემ უმეროვმა განაცხადა.

„დავიწყეთ რიადში ამერიკის გუნდთან შეხვედრა. ჩვენ ვასრულებთ უკრაინის პრეზიდენტის დავალებებს ჩვენი სახელმწიფოსთვის ღირსეულ მშვიდობასთან მისაახლოებლად და უსაფრთხოების უზრუნველსაყოფად. მაგიდაზე, კერძოდ, არის წინადადებები ენერგეტიკული ობიექტებისა და ინფრასტრუქტურის უსაფრთხოების შესახებ“, - დაწერა მან ფეისბუკში.

უმეროვის თქმით, დღეს მხარეები განიხილავენ უამრავ „კომპლექსურ ტექნიკურ საკითხს“. დელეგაციაში შედიან „ენერგეტიკის სპეციალისტები, ასევე სამხედრო წარმომადგენლები“.

რიადშივე ცალკე გაიმართება აშშ-სა და რუსეთს შორის მოლაპარაკებები. მხარეები სავარაუდოდ ორშაბათს, 24 მარტს შეხვდებიან ერთმანეთს მოლაპარაკებების მაგიდასთან.