radiotavisupleba ახალი ამბები 
სერბეთში 25 ოქტომბერს ვადამდელი საპარლამენტო არჩევნები ტარდება. გამარჯვებისთვის იბრძვიან ახლახან გადამდგარი პრეზიდენტის, ალექსანდარ ვუჩიჩის მომხრეები - ის პრემიერ-მინისტრის პოსტის დაკავებით გეგმავს ხელისუფლებაში დაბრუნებას - და სტუდენტური სია „სტუდენტები იმარჯვებენ“, რომელიც ბოლო ორი წლის განმავლობაში სერბეთში გაშლილი უმსხვილესი ანტისამთავრობო პროტესტის აქტივისტებმა ჩამოაყალიბეს. არჩევნებში სულ 18 პოლიტიკური ძალა მონაწილეობს, თუმცა ძირითადი ბრძოლა ორ მათგანს შორის მიმდინარეობს. ამას აჩვენებს წინასაარჩევნო გამოკითხვებიც, რომელთა თანახმადაც, ვუჩიჩის მომხრეებსაც და მის ოპონენტებსაც მხარს უჭერს ამომრჩეველთა 40%-ზე მეტი.
საარჩევნო უბნებთან დილიდანვე დადგა რიგები. აქტივობა, ოფიციალური მონაცემებით, საგრძნობლად მაღალია, ვიდრე გასული წლების არჩევნებზე იყო - შუადღისთვის უკვე ხმა მისცა ამომრჩეველთა დაახლოებით 25%-მა.
ქვეყანაში მასობრივი საპროტესტო გამოსვლები გრძელდება 2024 წლის დეკემბრიდან, როდესაც ტრაგედიის - ნოვი-სადის რკინიგზის სადგურზე კონსტრუქციის ჩამოშლის - შედეგად 16 ადამიანი დაიღუპა. სტუდენტურმა მოძრაობამ და აქტივისტებმა, რომლებიც მათ მიუერთდნენ, ხელისუფლება კორუფციაში დაადანაშაულეს, რამაც, მათი აზრით, გამოიწვია მომხდარი ტრაგედია. დაიწყეს ვუჩიჩის გადადგომისა და ხელისუფლებიდან მისი „სერბეთის პროგრესული პარტიის“ ჩამოშორების მოთხოვნების დაყენება.
ვუჩიჩის მომხრეები, თავის მხრივ, სტუდენტებს „ფერადი რევოლუციის“ მომზადებასა და უცხოეთიდან დაფინანსებაში ადანაშაულებენ. ვუჩიჩი ასევე ამტკიცებს, რომ გამარჯვების შემთხვევაში მისი მოწინააღმდეგეები დაუყოვნებლივ დააწესებენ რუსეთის წინააღმდეგ სანქციებს. ამასთან, სტუდენტურ მოძრაობას ამის შესახებ არ გაუკეთებია განცხადება. ის აერთიანებს როგორც ლიბერალური, ისე ნაციონალისტური იდეების მომხრეებს.
სტუდენტური სია მომიტინგეთა შორის გამართული დისკუსიების შედეგად ჩამოყალიბდა, თუმცა თავად პროტესტის ლიდერები მასში არ შესულან. კანდიდატები გახდნენ მეცნიერები, ექიმები, კულტურის მოღვაწეები და საზოგადოებრივი ორგანიზაციების აქტივისტები. სიას სათავეში უდგას კარდიოლოგი ილია სრდანოვიჩი.
კენჭისყრის წინასწარ შედეგებს 25 ოქტომბრის საღამოსთვის ელოდებიან.
