6 hours ago
4
სომხეთის პრეზიდენტმა ვაჰაგნ ხაჩატურიანმა ხელი მოაწერა კანონს ევროკავშირში ქვეყნის გაწევრიანების პროცესის დაწყების შესახებ, იტყობინება სახელმწიფოს მეთაურის ოფიციალური ვებგვერდი 4 აპრილს.
კანონი აცხადებს სომხეთის განზრახვას შეუერთდეს" პროგრესული, ცივილიზებული და განვითარებული კაცობრიობის ოჯახს " და აძლიერებს ამჟამინდელი ხელისუფლების პოლიტიკურ ნებას და გადაწყვეტილებას ამ კურსის განსახორციელებლად.
დოკუმენტში აღნიშნულია, რომ ევროკავშირში გაწევრიანება ხელს შეუწყობს ეროვნული უსაფრთხოების უზრუნველყოფას, არმიის მოდერნიზაციას ევროკავშირის წევრი ქვეყნების სტანდარტების შესაბამისად, ადამიანის უფლებების გაძლიერებას, ახალი ეკონომიკური მექანიზმების შექმნას, ასევე ცხოვრების დონის გაუმჯობესებას და დემოგრაფიული პრობლემების მოგვარება.
სომხეთის პარლამენტმა, 25 მარტს, ხმათა უმრავლესობით, საბოლოოდ მიიღო კანონპროექტი ევროკავშირში სომხეთის გაწევრების პროცესის დაწყების შესახებ.
ევროკავშირის წევრობის კანდიდატის სტატუსის მოსაპოვებლად სომხეთს დასჭირდება ბევრი რეფორმის გატარება და თავისი კანონმდებლობის ევროკავშირის კანონმდებლობასთან დაახლოება.
სამხრეთ კავკასიაში საქართველო ერთადერთი ქვეყანაა, რომელსაც ევროკავშირის წევრობის კანდიდატის სტატუსი აქვს, თუმცა, 2024 წლის ივნისში, ევროკავშირმა საქართველოში დემოკრატიის უკუსვლისა და კანდიდატის ვალდებულებებისგან უკან დახევის გამო შეაჩერა ქვეყნის გაწევრების პროცესი და ხელისუფლებას ევროინტეგრაციის გზაზე დაბრუნებისთვის საჭირო ნაბიჯებისკენ მოუწოდა. მათ შორის იყო ე.წ. აგენტების კანონის გაუქმება.
2024 წლის ნოემბერში „ქართული ოცნების" ხელისუფლებამ გამოაცხადა, რომ 2028 წლის ბოლომდე დღის წესრიგში აღარ დააყენებს ევროკავშირში გასაწევრიანებლად მოლაპარაკების გახსნის საკითხს. ამ გადაწყვეტილების გამო საქართველოში დღემდე მიმდინარეობს საპროტესტო აქციები ახალი საპარლამენტო არჩევნების მოთხოვნით.
English (US) · 
Georgian (GE) ·