სომხეთში რუსეთის ელჩს პროტესტის ნოტა გადასცეს

სომხეთის საგარეო საქმეთა სამინისტრომ დაიბარა რუსეთის ელჩი სერგეი კოპირკინი და საპროტესტო ნოტა გადასცა მას. ამის მიზეზი გახდა „რესპუბლიკის სუვერენიტეტისა და ტერიტორიული მთლიანობის წინააღმდეგ მიმართული ნარატივები“ ტელეარხ „როსია 1“-ის 12 იანვრის პროგრამაში. ამის შესახებ სომხეთის საგარეო საქმეთა სამინისტროს ვებსაიტი იტყობინება.

არ აკონკრეტებენ, გადაცემის წამყვან დმიტრი კისელიოვის რომელი სიტყვები იყო მიმართული სომხეთის სუვერენიტეტის წინააღმდეგ. გადაცემა „ვესტი ნედელის“ 12 იანვრის გამოშვებაში ერთ-ერთი სიუჟეტი სომხეთ-აზერბაიჯანის ურთიერთობებს მიეძღვნა. კისელიოვი ამტკიცებდა, რომ ერევანი უგულებელყოფს „სამმხრივი ხელშეკრულებით ნაკისრ ვალდებულებებს“ და აზერბაიჯანის პრეზიდენტ ილჰამ ალიევის მოთხოვნას, გახსნას ზანგეზურის დერეფანი, გზა სომხეთის სიუნიკის რაიონის გავლით, რომელიც დააკავშირებს აზერბაიჯანს მის ექსკლავ ნახიჩევანის ავტონომიურ რესპუბლიკასთან.

წამყვანმა ასევე განაცხადა, რომ სომხური პროექტი „მშვიდობის გზაჯვარედინი“, რომელიც სამხრეთ კავკასიაში სატრანსპორტო კომუნიკაციების განბლოკვას ისახავს მიზნად, აზერბაიჯანული მხარისთვის მიუღებელია „მთის რთულ რელიეფზე გზების აშენების აუცილებლობის“ გამო.

კისელიოვმა ასევე ისაუბრა სომხეთის ევროკავშირში გაწევრიანების პროცესის დაწყებაზე და „რუსეთთან ურთიერთობის შეწყვეტაზე“. „ეს კარგად არ დამთავრდება. როგორც ამბობენ, თქვენი არჩევანია“, თქვა წამყვანმა.

მოსკოვს, ერევანსა და ბაქოს შორის სამმხრივი შეთანხმების თანახმად, რომელიც 2020 წლის ნოემბერში გაფორმდა მას შემდეგ, რაც აზერბაიჯანმა სომხეთთან 44-დღიანი ომის შედეგად მთიანი ყარაბაღის ტერიტორიების უმეტესი ნაწილი დაიბრუნა, სომხურ მხარეს უნდა განებლოკა კომუნიკაციები და უზრუნველეყო სატრანსპორტო კავშირების უსაფრთხოება აზერბაიჯანის დასავლეთ რეგიონებსა და ნახიჩევანს შორის. კონტროლი რუსეთის ფსბ-ს სასაზღვრო ჯარებს უნდა განეხორციელებინათ.

რეგიონში სატრანსპორტო კავშირების აღდგენის საკითხი ბოლო წლებში სომხეთსა და აზერბაიჯანს შორის ურთიერთობების ერთ-ერთ მწვავე საკითხად იქცა. ორივე მხარე განსხვავებულად განმარტავს 2020 წლის ნოემბრის სამმხრივ განცხადებას.