სოხუმის აეროპორტიდან რეგულარული ფრენები მაისიდან დაიწყება – კრემლი

სოხუმის აეროპორტში განხორციელებული საპილოტე ფრენის შემდეგ, დღეს 27 თებერვალს კიდევ ერთი თვითმფრინავი აფრინდა. ამჯერად, ოფიციალური ინფორმაციით, საგანგებო სიტუაციების მართვის სამსახურის სპეციალური რეისი შესრულდა, რითაც სოხუმიდან რუსეთის მიმართულებით მძიმე პაციენტები, მათ შორის ბავშვები გადაიყვანეს. რეგულარული ფრენები კი, მოსკოვის ცნობით 2025 წლის პირველი მაისიდან დაიწყება.

“რუსეთი აბსოლუტურად დარწმუნებულია, რომ პირველი მაისიდან აფხაზეთთან რეგულარული ავიამიმოსვლა დაიწყება. იმის გამო, რომ აეროპორტის ყველა სისტემის გამართულობა პირველივე საცდელი რეისის დროს შემოწმდა, ახლა ჩვენ გვაქვს სრული დადასტურება და აბსოლუტური დარწმუნებულობა, რომ სოხუმის აეროპორტში რეგულარული საჰაერო მიმოსვლა შეიძლება დაიწყოს”, – ამის შესახებ ჟურნალისტებს რუსეთის ფედერაციის პრეზიდენტის ადმინისტრაციის პირველი მოადგილე სერგეი კირიენკომ განუცხადა.

მისივე თქმით, „აფხაზი მედიკოსებისა და აფხაზეთის ჯანდაცვის სამინისტროს თხოვნის საფუძველზე, რუსეთის საგანგებო სიტუაციების სამინისტროს სპეციალური ბორტი მიფრინავს, საბედნიეროდ, ასაფრენი ზოლი მზად არის. შესაბამისად, რუსი მედიკოსები ამ ბორტით იმგზავრებენ, რათა ბავშვები და მოზრდილი პაციენტები გადაიყვანონ და მათ რუსეთის კლინიკებში სწრაფი სამედიცინო დახმარება აღმოუჩინონ“.

თებერვლის დასაწყისში სოხუმის აეროპორტმა 30 წელზე მეტი ხნის შემდეგ პირველი რეისი მიიღო მოსკოვიდან.

სოხუმის აეროპორტის რეკონსტრუქციას რუსული კომპანია „ინფრასტრუქტურული განვითარება“ ახორციელებს. 2023 წლის 27 ოქტომბერს აფხაზეთის მთავრობამ მასთან საჯარო-კერძო პარტნიორობის შესახებ შეთანხმება გააფორმა.

ამ შეთანხმების მიხედვით, როგორც სოხუმი ირწმუნება, აფხაზეთის საკუთრებაში რჩება აეროდრომი, აეროდრომის ინფრასტრუქტურა და ისტორიული ტერმინალი. ასევე შენარჩუნდება ორმაგი დანიშნულების ობიექტის სტატუსი და აეროპორტის სახელწოდება.