სტამბოლში ათიათასობით ადამიანი გავიდა ქუჩებში იმამოღლუს გათავისუფლების მოთხოვნით

29 მარტის დემონსტრაციაზე გამოსულები თავიდან ქალაქის აზიურ ნაწილში შეიკრიბნენ. მათ ხელში ეჭირათ თურქეთის დროშები და პლაკატები თურქეთის თანამედროვე სახელმწიფოს დამაარსებლის, ქემალ ათა თურქის გამოსახულებით.

დემონსტრანტები იმამოღლუს გათავისუფლებასთან ერთად მოითხოვდნენ ერდოანის გადადგომას.

ამასობაში იმამოღლუს ადვოკატი საპატიმროდან გაათავისუფლეს. პოლიციამ ის ფულის გათეთრებაში ეჭვის გამო დააკავა.

თურქეთის ოპოზიციურმა „რესპუბლიკურმა სახალხო პარტიამ“ ექრემ იმამოღლუ პრეზიდენტობის კანდიდატად დაასახელა დაპატიმრების შემდეგ.

თურქეთში ერთ-ერთი ყველაზე პოპულარული პოლიტიკოსი, 54 წლის იმამოღლუ 19 მარტს დააკავეს კორუფციის ბრალდებით. მის წინააღმდეგ გამოძიება მიმდინარეობს ტერორიზმის ხელშეწყობის საქმეზეც. 23 მარტს სასამართლომ იმამოღლუს წინასწარი პატიმრობა შეუფარდა.