ტრამპის ადმინისტრაცია უკრაინისთვის სამხედრო დახმარების სრულად შეჩერებას განიხილავს – WP

აშშ-ის პრეზიდენტ დონალდ ტრამპის ადმინისტრაცია უკრაინისთვის სამხედრო მხარდაჭერის სრულად შეწყვეტის საკითხს განიხილავს. ამის შესახებ ინფორმაციას ვაშინგტონ პოსტი აქვეყნებს თეთრ სახლში ანონიმურ წყაროზე დაყრდნობით.

გამოცემის ცნობით, ეს გადაწყვეტილება განიხილება წუხელ თეთრ სახლში მომხდარი კამათის და “სამშვიდობო პროცესის მიმართ ზელენსკის შეურიგებლობის” საპასუხოდ.

ამავე დროს, იგივე წყარო უარყოფს, რომ ტრამპის გუნდის კონფრონტაცია ზელენსკისთან დაგეგმილი იყო. მის თანახმად, პირიქით, ვაშინგტონში სცადეს შეექმნათ პოზიტიური ფონი ზელენსკის ვიზიტისთვის. სწორედ ამის შედეგი იყო ის, რომ ტრამპმა შეცვალა თავისი პოზიცია ზელენსკის “დიქტატორობასთან” დაკავშირებით.

თუ თეთრი სახლი უკრაინას სამხედრო დახმარებას შეუჩერებს, ეს შეეხება რადარებს, სამხედრო ტექნიკას და რაკეტებს, რომლებიც ჯამურად მილიარდობით დოლარი ღირს.

თეთრ სახლში უკრაინისა და აშშ-ის პრეზიდენტებს შორის შეხვედრა და დიალოგი მწვავე კამათის ფონზე წარიმართა. ტრამპმა შეხვედრის შემდეგ განაცხადა, რომ ზელენსკიმ უპატივცემულობა გამოავლინა თეთრი სახლის ოვალურ კაბინეტში.

„ძალიან მნიშვნელოვანი შეხვედრა გვქონდა დღეს თეთრ სახლში. ბევრ რამეს გაიგებ ასეთ შეხვედრაზე ისეთს, რასაც ვერასდროს მიხვდები საუბრის გარეშე ასეთ წნეხსა და დაძაბულობაში. შესანიშნავია, რომ ემოციებით ბევრ რამეს ავლენს. მე მივხვდი, რომ პრეზიდენტი ზელენსკი არ არის მზად მშვიდობისთვის, თუ ამერიკა ჩაერთვება საქმეში, რადგან მას ჰგონია, რომ ჩვენი ჩართულობა დიდ უპირატესობას აძლევს მოლაპარაკებებში. მე არ მინდა უპირატესობა, მე მინდა მშვიდობა. მან უპატივცემულობა გამოავლინა შეერთებული შტატებისადმი ჩვენთვის ძვირფას ოვალურ კაბინეტში. შეუძლია მაშინ დაბრუნდეს, როცა მშვიდობისთვის იქნება მზად“, — განაცხადა ტრამპმა ზელენსკისთან შეხვედრის შემდეგ.

რამდენიმე დღით ადრე ტრამპმა ზელენსკი დიქტატორად მოიხსენია. მერე კი, ჟურნალისტის კითხვის პასუხად, აღნიშნა, რომ არ სჯერა, უკრაინის პრეზიდენტს დიქტატორს არ უწოდებდა.

უკრაინის პრეზიდენტმა ვოლოდიმირ ზელენსკიმ, თეთრ სახლში ტრამპთან და ვიცე-პრეზიდენტ ჯეიდი ვანსთან დაძაბული შეხვედრის შემდეგ, ტელეკომპანია FOX-ის ეთერში ისაუბრა.

„გაგვიჭირდება თქვენი დახმარების გარეშე. თქვენი ხალხი ჩვენს ხალხს გადარჩენაში ეხმარება. ამიტომ ვართ აქ. ვწუხვარ იმ კამათის გამო [რაც თეთრ სახლში მოხდა]“, — თქვა ზელენსკიმ.