15 hours ago
4
უკრაინის პრეზიდენტმა ვოლოდიმირ ზელენსკიმ სახელმწიფო უშიშროების სამსახურს დაავალა გამოიძიოს ბუნებრივი რესურსების თაობაზე შეერთებული შტატების მიერ შემოთავაზებული შეთანხმების უახლესი პროექტის გაჟონვა. ამის შესახებ ინფორმაციას Financial Times-ი საკუთარ წყაროებზე დაყრდნობით ავრცელებს.
გაზეთის თანამოსაუბრეებმა თქვეს, რომ რამდენიმე სამინისტროს თანამშრომლები სიცრუის დეტექტორზე შეამოწმეს. მაგრამ უცნობია, თუ სულ რამდენი ადამიანი დაიკითხა.
გამოძიება დაიწყო მას შემდეგ, რაც უკრაინის ვერხოვნა რადის დეპუტატმა იაროსლავ ჟელეზნიაკმა 26 მარტს გამოაქვეყნა ხელშეკრულების პროექტის დეტალები. მან არ გაამჟღავნა, თუ როგორ მოიპოვა დოკუმენტის ასლი.
FT აღნიშნავს, რომ გამოძიება მიმდინარეობს კიევსა და აშშ-ის პრეზიდენტ დონალდ ტრამპის ადმინისტრაციას შორის შემოთავაზებული გარიგების პირობების გამო წარმოქმნილი მზარდი დაძაბულობის ფონზე. მანამდე ცნობილი გახდა, რომ შეერთებული შტატები დაჟინებით მოითხოვს ხელშეკრულების დადებას, რომელიც გავრცელდება უკრაინის ყველა ბუნებრივ წიაღისეულზე, მათ შორის ნავთობსა და გაზზე, ასევე ქვეყნის მთავარ ენერგეტიკულ აქტივებზე.
უკრაინის მაღალჩინოსნებმა FT-ს განუცხადეს, რომ გარიგებამ შეიძლება შეარყიოს უკრაინის სუვერენიტეტი, მოგება მიმართოს საზღვარგარეთ და გაზარდოს ქვეყნის დამოკიდებულება ვაშინგტონზე.
დონალდ ტრამპმა ამ კვირაში დაადანაშაულა უკრაინის პრეზიდენტი ვოლოდიმირ ზელენსკი გარიგებაზე "უარის თქმის მცდელობაში". მან ასევე დასძინა, რომ ზელენსკის "დიდი პრობლემები" შეექმნება, თუ შეთანხმებას მალე არ მოაწერს ხელს.
დონალდ ტრამპმა ეს 30 მარტს ჟურნალისტებს უთხრა პრეზიდენტის თვითმფრინავში, რომლითაც უქმე დღეების შემდეგ ფლორიდის რეზიდენციიდან ვაშინგტონში დაბრუნდა.
მანამდე დასავლეთის და უკრაინის მედიასაშუალებები წერდნენ, რომ ამერიკის შეერთებულმა შტატებმა უკრაინას წარუდგინა შეთანხმების განახლებული პროექტი, რომელიც ითვალისწინებს უკრაინის ბუნებრივ რესურსებზე სრულ კონტროლს უსაფრთხოების გარანტიების გარეშე.
English (US) · 
Georgian (GE) ·