უკრაინის საჰაერო ძალების ცნობით, რუსეთმა მორიგი შეტევისთვის 100-მდე დრონი გამოიყენა

უკრაინის საჰაერო ძალების სარდლობის მიერ დღეს, 4 მარტს დილით გამოქვეყნებული მონაცემებით, გასული ღამის განმავლობაში რუსეთის საოკუპაციო ძალებმა გამოიყენეს სხვადასხვა ტიპის 99 დრონი.

სარდლობის თანახმად, უკრაინის საჰაერო და თავდაცვის ძალების ქვედანაყოფებმა 65 ე.წ. დამრტყმელი უპილოტო საფრენი აპარატი ჩამოაგდეს ხარკოვის, პოლტავის, სუმის, კიროვოგრადის, დნეპროპეტროვსკის, ზაპოროჟიეს, დონეცკის, ოდესისა და ნიკოლაევის ოლქებში, ხოლო 32 „უპილოტო-იმიტატორი ლოკალურად დაიკარგა ნეგატიური შედეგების გარეშე“.

უკრაინის საჰაერო ძალების ინფორმაციით, უპილოტო საფრენი აპარატებით შეტევის შედეგად დაზარალდნენ ოდესის, სუმისა და დონეცკის ოლქები.

ოდესის საოლქო-სამხედრო ადმინისტრაციის ცნობით, დრონებით თავდასხმისას დაშავდა ოთხი ადამიანი. დაზიანებულია სახლები და ენერგოობიექტები.

ქალაქ სუმიში დაზიანებულია ბავშვთა პოლიკლინიკის შენობა. ამის შესახებ ადგილობრივი ხელისუფლება იუწყება. ქალაქის ნაწილს ელექტროენერგიის მიწოდება შეუწყდა.