radiotavisupleba ახალი ამბები 
ფინეთის პრეზიდენტი ალექსანდერ სტუბი და ნორვეგიის პრემიერ-მინისტრი იონას გარ სტიორე ტელეფონით ესაუბრნენ რუსეთის პრეზიდენტ ვლადიმირ პუტინს. საუბარი 27 ოქტომბერს შედგა, რაც კრემლის პრესმდივანმა პესკოვმაც დაადასტურა.
ფინეთის პრეზიდენტის ოფიციალურ საიტზე გამოქვეყნებული ცნობით, ჰელსინკიდან გამართული საუბრის ინიციატორები იყვნენ ფინეთის პრეზიდენტი და ნორვეგიის პრემიერ-მინისტრი, რათა განეხილათ რუსეთის აგრესიული ომი უკრაინის წინააღმდეგ და დიპლომატიური ძალისხმევა, რომელიც მიმართულია ომის შეწყვეტისა და ევროპაში მშვიდობისა და სტაბილურობის ხელშეწყობისკენ.
ფინეთის პრეზიდენტის ოფისის თანახმად, პუტინთან საუბარი უკრაინასთან კონსულტაციით გაიმართა და ოსლოში 20 ოქტომბერს გამართული შეხვედრის გაგრძელება იყო.
- 20 ოქტომბერს უკრაინის პრეზიდენტი ვოლოდიმირ ზელენსკი ნორვეგიის პრემიერ-მინისტრთან და ფინეთის პრეზიდენტთან ერთად ოსლოში შეხვდა აშშ-ის პრეზიდენტის სპეციალურ წარმომადგენელს სტივენ უიტკოფს.
- მოლაპარაკებაში, რომელზეც განიხილებოდა უკრაინაში ომის დასრულებასთან დაკავშირებული წინადადებები, ონლაინ მონაწილეობდა პრეზიდენტ ტრამპის კიდევ ერთი წარმომადგენელი, მისი სიძე ჯარედ კუშნერი.
- ოსლოდან უიტკოფი გაემგზავრა სანქტ-პეტერბურგში, სადაც რუსეთის პრეზიდენტ პუტინს შეხვდა.
- ოსლოსა და პეტერბურგში გამართული მოლაპარაკებების შემდეგ გამოცხადდა, რომ სავარაუდოდ, ნოემბრიდან განახლდება აშშ-უკრაინა-რუსეთის სამმხრივი შეხვედრები
