ყაველაშვილის პირველი საგარეო ვიზიტი აზერბაიჯანში, მეორე კი სომხეთშია დაგეგმილი

ინფორმაცია ყაველაშვილის დაგეგმილი ვიზიტების შესახებ გაავრცელა მისმა მრჩეველმა საერთაშორისო ურთიერთობების საკითხებში, ლუკა ეხვაიამ.

საზოგადოებრივი მაუწყებლის პოდკასტ „42-ე პარალელის“ 2 აპრილს გასულ ეპიზოდში ლუკა ეხვაიამ თქვა, რომ ყაველაშვილის პირველი საგარეო ვიზიტი 14-15 აპრილს აზერბაიჯანში შედგება.

„შემდეგ უკვე სომხეთში, სავარაუდოდ, თვის ბოლოს. რიცხვები ჯერ არ არის განსაზღვრული“, - თქვა მან.

ლუკა ეხვაია, - რომელიც აშშ-ის მიერ საქართველოსთან სტრატეგიული თანამშრომლობის გაწყვეტას მიიჩნევს „დიდ ნაბიჯად დეკოლონიზაციის გზაზე“ და მიაჩნია, რომ საჭიროა, საქართველო რეგიონულ „3+3“ ფორმატში უნდა ჩაერთოს, - ყაველაშვილის მრჩევლად დაინიშნა საერთაშორისო ურთიერთობების საკითხებში.

„ქართული ოცნების“ მთავრობის მეთაური ირაკლი კობახიძე 2024 წლის არჩევნების შემდეგ ორივე სახელმწიფოში იმყოფებოდა. ერევანში ის 20 მარტსაც ჩავიდა და სომხეთ-საქართველოს საფეხბურთო ნაკრებების შეხვედრასაც დაესწრო.

„ქართული ოცნების“ ხელისუფლებას საერთაშორისო დონეზე პრობლემები აქვს 2024 წლის არჩევნებისას გაყალბებაზე ბრალდებების, მოგვიანებით ევროკავშირთან მოლაპარაკებების გახსნის დღის წესრიგში დაყენების გადავადებისა და საპროტესტო დემონსტრაციების ძალის გამოყენებით დარბევის ფონზე.

მმართველ გუნდს გასული განმავლობაში დასავლეთთან ურთიერთობები იმდენად გაუფუჭდა, რომ 2024 წლის სადავო არჩევნებში გამარჯვება ევროკავშირის მხოლოდ ერთმა ქვეყანამ, უნგრეთმა მიულოცა.

ევროკავშირი და მისი წევრი არაერთი ქვეყანა, აშშ-სთან ერთად, არჩევნებისას დარღვევებზე მიუთითებენ. ქვეყნების ნაწილმა „ქართული ოცნების“ ლიდერებს და მათთან დაკავშირებულ პირებს სანქციები დაუწესა.