შეუფერებელ დროს ვიზიტი ვერ დაეხმარება კრიზისის განმუხტვას – ზურაბიშვილი კაუმას

სალომე ზურაბიშვილი ეუთოს საპარლამენტო ასამბლეის პრეზიდენტის, პია კაუმას საქართველოში ვიზიტის დროს შეუფერებლად მიიჩნევს.

მისი თქმით, ეს ქვეყანაში არსებულ კრიზისს ვერ განმუხტავს. პირიქით, აღშფოთებას გამოიწვევს იმ ადამიანებში, რომლებიც უწყვეტი აქციებით აპროტესტებენ 26 ოქტომბრის არჩევნების გაყალბებას და ქვეყნის რუსეთისკენ სვლას.

“ეუთოს საპარლამენტო ასამბლეის პრეზიდენტის, პია კაუმას დაგეგმილი ვიზიტი საქართველოში იწვევს იმ ადამიანების აღშფოთებას, რომლებიც 40 დღეა თბილისის ქუჩებში დგანან გაყალბებული არჩევნებისა და რუსეთისკენ სვლის გასაპროტესტებლად. ასეთ შეუფერებელ დროს ვიზიტი არ დაეხმარება კრიზისის განმუხტვას, ეს მხოლოდ არჩევნებს შეუძლია”, – წერს მე-5 პრეზიდენტი სოციალურ ქსელ X-ზე.

The planned visit to Georgia of @oscepa President @piakauma outrages the people standing on the Tbilisi streets for 40 nights, protesting rigged elections, and turn to Russia . Such an ill timed visit will not help to solve the crisis, only elections can!

— Salome Zourabichvili (@Zourabichvili_S) January 6, 2025

ზურაბიშვილმა გააზიარა რესპუბლიკელი კონგრესმენის, ჯო უილსონის მიერ პია კაუმასთვის გაგზავნილი წერილი, სადაც ამერიკელი პოლიტიკოსი ასამბლეის პრეზიდენტს მოუწოდებს საქართველოში ოფიციალური ვიზიტით ლეგიტიმაცია არ მიანიჭოს “ქართულ ოცნებას”.

“ეს არის საქართველოს ევროპელი და ამერიკელი პარტნიორების საერთო შეშფოთება, ვინც ზრუნავს საქართველოში სტაბილურობაზე, დემოკრატიასა და ადამიანის უფლებების დაცვაზე. ეს უნდა იყოს თქვენი ერთადერთი მიზანი, რისი ერთადერთი საშუალებაც ახალი არჩევნებია ეუთოს რეკომენდაციების შესაბამისად”, – ასე მიმართავს ზურაბიშვილი კაუმას.

@oscepaPresident @PiaKauma this is a shared concern of all Georgia’s european and american partners who care about stability, democracy and human rights in Georgia. Those should be your only goal, the only means being new elections applying osce recommendations. https://t.co/kvLkBSvYGq

— Salome Zourabichvili (@Zourabichvili_S) January 6, 2025

უილსონი კაუმას წერს, რომ საქართველოში მის ოფიციალურ ვიზიტს “ივანიშვილის რეჟიმი” საკუთარი ლეგიტიმაციისთვის გამოიყენებს.

“აქამდეც ვნახეთ, როგორ ყალბად გამოიყენა პარტიამ ეუთოს საპარლამენტო ასამბლეის ვიცე-პრეზიდენტის წერილი არჩევნებთან დაკავშირებული რეკომენდაციების შესახებ, რომ თითქოს, ეუთო აღიარებდა არჩევნების შედეგებს. მიუხედავად თქვენი კეთილშობილური მიზნებისა, ვშიშობ, რომ „ქართული ოცნება“ აუცილებლად არასწორად წარმოაჩენს თქვენს ჩართულობას, როგორც საერთაშორისო აღიარების დასტურს“, — წერია კონგრესმენის მიერ ეუთოს საპარლამენტო ასამბლეის პრეზიდენტისადმი მიწერილ წერილში.

პია კაუმას ვიზიტი თბილისში 8-10 იანვარს იგეგმება.

ამავე თემაზე:

• OSCE PA-ს პრეზიდენტი საქართველოში ვიზიტს გეგმავს, რაც კატასტროფული და ცუდ დროს შერჩეული ნაბიჯია – კოლსი