netgazeti 
შვედეთის არჩევნებში ცენტრისტული-მემარცხენე ოპოზიცია მცირე უპირატესობით ლიდერობს მემარჯვენე მთავრობაზე.
როიტერსის ინფორმაციით, მოსალოდნელია, რომ მემარცხენე ბლოკს, რომელსაც სოციალ-დემოკრატების ლიდერი მაგდალენა ანდერსონი ხელმძღვანელობს, 349-ადგილიან პარლამენტში, 176 მანდატს მოიპოვებს. ეს მონაცემები შვედეთის 6 312 საარჩევნო უბნიდან 6 195-ის ხმებს ეფუძნება.
პრემიერ-მინისტრ ულფ კრისტერსონის მემარჯვენე მმართველი ბლოკი 173 მანდატს იღებს. ხმების დათვლა გრძელდება, ხოლო საბოლოო შედეგებს, სულ მცირე, ოთხშაბათისთვის ელიან.
“არჩევნები, მიუხედავად იმისა, რომ ნაკლებად სავარაუდოა შეცვალოს შვედეთის პროდასავლური და პროუკრაინული კურსი, შეიძლება გადაწყვიტოს, გაგრძელდება თუ დაჩქარდება კრისტერსონის სწრაფვა მიგრაციაზე ულტრამემარჯვენე მკაცრი შეზღუდვებისკენ”, – წერს როიტერსი.
გამარჯვებულის ვინაობა შესაძლოა რამდენიმე დღის განმავლობაში არ იყოს ცნობილი, სანამ საზღვარგარეთიდან შემოსული ყველა ბიულეტენი არ დაითვლება.
„ეს ძალიან მჭიდრო რბოლაა, ძალიან გრძელი ღამე იქნება, მაგრამ ვფიქრობ, სოციალ-დემოკრატებმა საკმაოდ კარგი არჩევნები ჩაატარეს“, – განაცხადა სოციალ-დემოკრატების მხარდამჭერმა და ექიმმა ადონაი ენდრიას კიდანემ ცენტრალურ სტოკჰოლმში პარტიის არჩევნების შემდგომ შეკრებაზე.
წინასაარჩევნო დაპირებაში, კრისტერსონმა დაარღვია დიდი ხნის ტაბუ და განაცხადა, რომ მთავრობაში მოიყვანდა „შვედ დემოკრატებს“ — ულტრამემარჯვენე პარტიას, რომელსაც ნეონაცისტური ფესვები აქვს, რადგან მისი მიზანი უმრავლესობის მქონე მემარჯვენე კოალიციის შექმნაა.
“10,6-მილიონიანი სკანდინავიური ქვეყნის ზოგიერთმა წარმომადგენელმა სიფრთხილე გამოხატა და აღნიშნა, რომ კრისტერსონის მიერ ულტრამემარჯვენეების მთავრობაში მიწვევა ზედმეტი იყო. კრისტერსონის კრიტიკოსები ასევე ამბობენ, რომ მისი საიმიგრაციო პოლიტიკა, წახალისებებითა და ჯარიმებით, რომლებიც აიძულებს მიგრანტებს ან უფრო მეტად მოერგონ შვედურ კულტურულ ნორმებს, ან დატოვონ ქვეყანა, სამოქალაქო თავისუფლებებს ძირს უთხრის.
კრისტერსონი თავისი ოთხწლიანი მმართველობის განმავლობაში საზოგადოებრივი აზრის გამოკითხვებში ჩამორჩებოდა, მაგრამ კამპანიის ბოლო კვირებში სხვაობა შეამცირა, მაშინ როცა ანდერსონმა და მისმა სოციალ-დემოკრატებმა პოზიციები დაკარგეს”, – წერს საინფორმაციო სააგენტო.
ხმის მიცემის დასრულებიდან რამდენიმე საათში, კრისტერსონმა განაცხადა, რომ ის ინარჩუნებს იმედს, რომ კვლავ შეძლებს უმრავლესობის შეკვრას იმ რვა პოლიტიკურ ჯგუფს შორის, რომლებმაც პარლამენტში ადგილები მოიპოვეს. მისი თქმით, მისი პარტიის ეკონომიკური პოლიტიკა უფრო პოპულარული იყო, ვიდრე ოპოზიციის.
„იმ შემთხვევაშიც კი, თუ ამაღამ დაფიქსირებული შედეგები შენარჩუნდება, მე შევისწავლი, შესაძლებელია თუ არა მთავრობის სიცოცხლისუნარიანი შემადგენლობის პოვნა… რომელიც შეძლებს უზრუნველყოს მხარდაჭერა იმ ფისკალური პოლიტიკისთვის, რომელსაც შვედმა ამომრჩევლებმა ხმა მისცეს“, – თქვა მან.
როიტერსის თანახმად, ანდერსონის ბლოკი დახლეჩილია უთანხმოებებით ისეთ საკითხებზე, როგორიცაა მიგრაცია (სადაც მას სურს უფრო შემზღუდავი ხაზი, ვიდრე ზოგიერთ მის პარტნიორს), მილიარდერებზე გადასახადის დაწესება და ახალი ბირთვული რეაქტორების მშენებლობა. მის ბიუჯეტებს ასევე შეიძლება გაუჭირდეს მხარდაჭერის მოპოვება, იმის გათვალისწინებით, რომ „მემარცხენე პარტია“ (შვედეთის ყოფილი კომუნისტური პარტია) და „ცენტრის პარტია“, რომელიც თავისუფალი ბაზრის პოლიტიკას უჭერს მხარს, ბევრ ეკონომიკურ საკითხზე ერთმანეთს ვერ უგებენ.
„შვედი დემოკრატების“ საარჩევნო წარმატებას მიესალმებოდნენ ევროპის აღმავალი ულტრამემარჯვენე პარტიები, რომლებიც გასულ კვირას გერმანიის მიწის არჩევნებში ანტიიმიგრანტული პარტიის „ალტერნატივა გერმანიისთვის“ გამარჯვებამ გააძლიერა.
ულტრამემარჯვენეებს იმედი აქვთ, რომ ევროპის მასშტაბით მომავალ არჩევნებში წარმატებას მიაღწევენ, სადაც მათი პოტენციურად ყველაზე დიდი ჯილდო მომავალ წელს საფრანგეთის საპრეზიდენტო არჩევნებზე ლე პენის კამპანია იქნება.
“შვედეთი დიდი ხნის განმავლობაში ევროპის ერთ-ერთი ყველაზე სტუმართმოყვარე ქვეყანა იყო ემიგრანტებისთვის, სანამ ოთხი წლის წინ ხელისუფლებაში კრისტერსონი არ მოვიდა. მისმა მთავრობამ გააუქმა მუდმივი ბინადრობის უფლება ლტოლვილებისთვის, გაამკაცრა სოციალური უზრუნველყოფის წესები და გააძლიერა იმ პირთა დეპორტაცია, ვისაც ქვეყანაში დარჩენის უფლება არ ჰქონდა”.
