შოიგუ: რუსეთი უკრაინაში დასავლურ იარაღზე დარტყმებს გააძლიერებს

რუსეთის თავდაცვის მინისტრმა სერგეი შოიგუმ განაცხადა, რომ რუსეთი გააძლიერებს დარტყმებს უკრაინის საცავ ბაზებზე, სადაც განთავსებულია დასავლეთის მიერ მიწოდებული იარაღი. განცხადება შოიგუმ იმის ფონზე გააკეთა, როდესაც შეერთებული შტატები ემზადება დაამტკიცოს და მიაწოდოს ახალი სამხედრო დახმარება კიევს.

შოიგუმ თქვა, რომ რუსეთმა „გაფანტა მითი დასავლური იარაღის უპირატესობის შესახებ“ და მისმა ძალებმა მოიპოვეს ინიციატივა 1000 კმ-ის სიგრძის ფრონტის ხაზზე.

უკრაინის პრეზიდენტმა ვოლოდიმირ ზელენსკიმ თქვა, რომ კიევი მალე მიიღებს უფრო მეტ, შორ მანძილზე მოქმედ სარაკეტო სისტემებს "ატაკამსს" და რომ ის ამერიკის ახალი სამხედრო დახმარების პაკეტის ნაწილია.

„ამერიკის შეერთებული შტატებისა და მისი მოკავშირეების საფრთხეების პროპორციულად, ჩვენ გავაგრძელებთ შეიარაღებული ძალების შემადგენლობისა და სტრუქტურის გაუმჯობესებას და ყველაზე პოპულარული იარაღისა და სამხედრო აღჭურვილობის წარმოებას“, - თქვა შოიგუმ.

„ჩვენ გავზრდით თავდასხმების ინტენსივობას ლოგისტიკურ ცენტრებზე და დასავლური იარაღის შესანახ ბაზებზე",- თქვა რუსეთის თავდაცვის მინისტრმა.

შოიგუმ გაიმეორა რუსეთის მიერ გავრცელებული ინფორმაცია, რომ მან ამ თვეში დაიკავა უკრაინული სოფლები პერვომაისკე, ბოჰდანივკა და ნოვომიხაილივკა. 22 აპრილს, უკრაინამ უარყო ამ უკანასკნელის დაცემა და თქვა, რომ მის ჯარებს უკავიათ სოფლის 15-20%.