შსს-ს ცნობით, რუსეთის მოქალაქე დააკავეს აქციის დროს პოლიციის ავტომობილის დაზიანებისთვის

პოლიციამ თბილისში მიმდინარე საპროტესტო აქციების დროს სისხლის სამართლის დანაშაულის ჩადენის ბრალდებით კიდევ ერთი პირი დააკავა. საქართველოს შსს-ს თანახმად, ის რუსეთის მოქალაქეა.

შსს-ს მიერ დღეს, 31 მარტს გავრცელებული ინფორმაციით, „გამოძიებით დადგინდა, რომ ბრალდებულმა, რომელსაც სახე სპეციალური ნიღბით ჰქონდა დაფარული, 28 მარტს, რუსთაველის გამზირზე, აქციის მიმდინარეობისას, შინაგან საქმეთა სამინისტროს ბალანსზე რიცხული ავტომობილი მიზანმიმართულად დააზიანა და შემთხვევის ადგილიდან მიიმალა”.

შსს-ს თანახმად, რუსეთის მოქალაქის, 1995 წელს დაბადებული დ.კ.-ს იდენტიფიცირება „ცხელ კვალზე ჩატარებული საგამოძიებო ღონისძიებების” შედეგად მოხდა და ის თბილისში დააკავეს.

რუსეთის მოქალაქეს ბრალად ედება სხვისი ნივთის დაზიანება. სისხლის სამართლის კოდესით, მსგავსი დანაშაული სამ წლამდე ვადით თავისუფლების აღკვეთას ითვალისწინებს.